Qazaqstanda aýyl sharýashylyǵyn tsıfrlandyrý qalaı júrip jatyr
ALMATY. KAZINFORM — Tsıfrlyq transformatsııa aýyl sharýashylyǵynda qarqyn aldy. Bul salada drondarmen egis alqaptaryn baqylaý, GPS-navıgatsııa, agroderektermen jumys, avtomattandyrylǵan sýarý jáne maldy basqarý júıesi sátti engizilip jatyr. Bul týraly Aýyl sharýashylyǵy mınıstrliginiń Kazinform saýalyna joldaǵan jaýabynda aıtylǵan.
Mınıstrlikten málim etkendeı, elde zamanaýı tehnologııalardy engizý arqyly aýyl sharýashylyǵynyń ónimdiligi men tıimdiligi artyp keledi.
Jasandy ıntellekt negizinde jumys isteıtin fermalar paıda boldy.
— Qazaqstanda barlyǵy 2243 ferma bar. Onyń ishinde tsıfrlyq fermalar belsendi túrde engizilip jatyr. Qazir elimiz boıynsha olardyń sany 200-den asty. Bul fermalar naqty eginshilik, drondar, sensorlar men GPS júıelerin keńinen qoldana otyryp, topyraq pen daqyldardyń jaı-kúıi týraly málimetterdi naqty ýaqyt rejıminde jınaýǵa, tuqym sebý, tyńaıtqysh engizý jáne sýarý úderisterin ońtaılandyrýǵa múmkindik beredi, — dep jazady vedomstvo mamandary.
Máselen, Soltústik Qazaqstan jáne Qostanaı oblystarynda egistikti spýtnıktik monıtorıng arqyly basqarý, agrohımııalyq taldaý jáne dál núktelik tyńaıtqysh engizý júıeleri keńinen qoldanylady.
Jetisý jáne Shyǵys Qazaqstan oblystarynda mal sharýashylyǵynda jasandy ıntellektpen jabdyqtalǵan saýý robottary, avtomattandyrylǵan azyqtandyrý júıeleri jáne mıkroklımatty baqylaý sheshimderi engizilgen.
Pavlodar oblysynda ylǵal únemdeýshi tehnologııalar men avtomattandyrylǵan sýarý júıeleri iske qosyldy.
Mal baǵýǵa arnalǵan drondar, GPS trekerler, elektrondy kartalar jáne otandyq basqarý platformalary qoldanysta. Keı óńirlerde pılotsyz tehnıkalar da synaqtan ótip jatyr.
— Sharýalar sońǵy jyldary GPS jáne avtopılot júıelerimen jabdyqtalǵan traktorlar jáne ózdiginen júretin egin jınaý kombaındary Djondır, Klaas sııaqty zamanaýı aýyl sharýashylyǵy tehnıkasyn keńinen qoldana bastady. Qazir sharýalar traktor-bespılotnık sııaqty zamanaýı, tsıfrlyq tehnologııalardy qoldana bastady. Mundaı tehnıkalar dál eginshilik aıasynda qoldanysqa enip jatyr. Bul tehnıkalar egis jumystarynyń dáldigin arttyryp, shyǵyndardy azaıtýǵa jáne ónimdilikti kóterýge múmkindik beredi. Tsıfrlyq tehnologııalardy engizý ásirese elimizdiń soltústik óńirlerinde qarqyndy júrip jatyr. Budan bólek, otardy naqty ýaqyt rejıminde baqylaý jáne mal jaıý kezinde týyndaýy múmkin máselelerge jedel áreket etý — munyń bári malshy drondarǵa múmkindik beredi. Qazaqstanda olardy Mańǵystaý, Batys Qazaqstan jáne Jambyl oblystarynda paıdalana bastady, — dep jazylǵan jaýapta.
Aıta keteıik, Jetisý oblysy Balpyq aýylynda tsıfrlyq sút taýar fermasy jumys istep jatyr. Ázirge ol óńirdegi tsıfrlyq jalǵyz ferma.
— Sút taýar fermasynda saýyn tabynyna robot kútim jasaıdy. Onyń arqasynda mal óte yńǵaıly jaǵdaıda ustalady. Sıyrlardyń deni saý jáne mol sút berýi úshin árqaısysynyń jaǵdaıyn sońǵy tsıfrlyq tehnologııalardyń kómegimen táýlik boıy baqylaıdy, — dep habarlady Jetisý oblysy ákimdiginen.
Sútti baǵyttaǵy iri qara ferma bólmesinde erkin qozǵalady jáne ózi saýý apparatyna keledi.
Munda saýynshy robot janýardyń fızıologııalyq jaǵdaıyn anyqtaıdy jáne súttiń mólsheri men sapasyn qosa alǵanda barlyq aqparat monıtorda kórinedi.
Robot tolyǵymen avtomattandyrylǵan. Sıyrdy saýý kerek pe, joq pa, qurylǵynyń ózi anyqtaıdy.
Saýǵannan keıin mindetti túrde dezınfektsııa protsedýrasyn júrgizedi. Fermadaǵy mundaı robottar sany — 10.
2024 jyly aýylsharýashylyq salasynda 280,3 mlrd teńgege 287 ınvestıtsııalyq joba iske asyryldy, bıyl 614,5 mlrd teńgeniń 284 jobasy qolǵa alynǵan.
Osyǵan deıin Aýyl sharýashylyǵy ónimderi arasyndaǵy ózara saýda kórsetkishi 59%-ǵa artqanyn jazǵanbyz.
Aıta keteıik, Qazaqstanda aýyl sharýashylyǵy sanaǵynyń bastalýyna bir aı qaldy.