Qazaqstanda aýǵan taýarlaryn satatyn saýda úıi ashylmaq
ALMATY. KAZINFORM – Qazaqstan naryǵy aýǵan kásipkerleri úshin ashyq bolǵanyn qalaımyz. Bul týraly Almatyda ótip jatqan bıznes forýmy barysynda Aýǵanstannyń saýda jáne ónerkásip mınıstri Nýrıddın Azızı aıtty.
Aýǵanstannyń saýda jáne ónerkásip mınıstriniń sózinshe, eki eldiń ekonomıkalyq baılanysy aıasynda elimizde Aýǵanstandyq saýda úıi ashylmaq.
«Biz Astana qalasynda aýǵandyq taýarlar satylatyn saýda úıin ashýdy josparlap otyrmyz. Odan keıin dástúrli kórmeler uıymdastyrmaqpyz. Qazaqstandyq naryqtyń aýǵan kásipkerleri úshin ashyq bolǵanyn qalaımyz. Osylaısha eki el arasyndaǵy ekonomıkalyq baılanysty arttyramyz»,- dedi Nýrıddın Azızı.
Buǵan deıin Qazaqstan men Aýǵanstan arasyndaǵy saýda aınalym 330,7 mln dollarǵa jetkeni týraly jazǵan edik.
Sondaı-aq Aýyl sharýashylyǵy vıtse-mınıstri Erbol Tasjúrekov Qazaqstan men Aýǵanstan aýyl sharýashylyq taýar aınalymyn 1 mlrd dollarǵa deıin arttyratynyn aıtqan bolatyn.
