Qazaqstanda aýany lastaýshy negizgi faktorlar - kúkirtsýtek, shań jáne qara kúıe

NUR-SULTAN. QazAqparat - Ekologııa, geologııa jáne tabıǵı resýrstary mınıstri Maǵzum Myrzaǵalıev aımaqtyq ekologııalyq departament basshylarymen qyzmettik kezdesý barysynda osyndaı tapsyrma berdi. Jıynda vedomstvo basshysy ekologııalyq retteý jáne baqylaý komıtetiniń tóraǵasy Zulpyhar Joldasovtyń sońǵy 9 aıdaǵy jumys boıynsha esebin tyńdady, dep habarlaıdy QazAqparat tilshisi.

Komıtet tóraǵasynyń sózinshe, atalǵan kezeńde Qazaqstanda joǵary deńgeıdegi lastaný jáne 8 ekstremaldy joǵary lastaný jaǵdaıy tirkelgen. Onyń 58-i - tabıǵı, 240-y - tehnogendik sıpattaǵy lastaný.

Aýanyń negizgi lastaýshylary – kúkirtsýtek, shań jáne qara kúıe. Al sý nysandarynda 210 joǵary deńgeıli, 6 ekstremaldy joǵary deńgeıli lastaný jaǵdaıy tirkelip otyr. Oǵan klımattyq jaǵdaılar, aǵyn sýlarǵa túsken tarıhı jáne óndiristik shyǵaryndylar sebep bolǵan.

«Biz sý resýrstary men atmosferalyq aýanyń ekologııalyq jaǵdaıyn keshendi túrde baqylaımyz. Budan bólek, «Qazaqstan ǵarysh sapary» ulttyq kompanııasymen birge monıtorıng jasap, stıhııaly svalkalardy joıamyz. Sońǵy 9 aıda 7632 qoqys orny anyqtalyp, onyń 5752-siniń kózin qurttyq. Qaldyq jınalý jaǵdaılary kóbine Aqmola oblysynda baıqaldy. Sonymen qatar ishki ister organdarymen, eriktilermen birge demalys aýmaqtarynda reıd jasap, quqyqbuzýshylyq oqıǵalaryn tirkedik»,- dedi Zulpyhar Joldasov.

Komıtet tóraǵasy qazir qoǵammen keri baılanys jolǵa qoıylǵanyn atap ótti. Endi azamattar aýmaqtyq departamentterge resmı hat arqyly ǵana emes, áleýmettik jeliler arqyly da júgine alady.

Jedel jeli qosylǵaly beri stıhııaly qoqys ornyna qatysty1000-ǵa jýyq shaǵym túsken. Jemqorlyq quqyqbuzýshylyq boıynsha profılaktıkalyq jumys turaqty túrde júredi.

Ekologııa mınıstri Maǵzum Myrzaǵalıev ekologııalyq baqylaý jumysynda halyqpen keri baılanys úlken ról atqaratynyn atap ótti.

«Qazir halyqpen ashyq, senimge qurylǵan ózara baılanys qurý óte mańyzdy. Shyn máninde biz ben qoǵamnyń múddesi bir: bárimiz taza aýa, ekologııalyq sý úshin, tabıǵat jáne janýarlardy qorǵaý úshin kúresemiz. Sondyqtan jurtshylyqqa barynsha ashyq jáne áleýmettik jelide qoljetimdi bolyp, ár shaǵym-ótinishke jyldam jaýap berip otyrýymyz kerek», - dedi mınıstr.

Sonymen birge ol tıimdi jumys júrý úshin naqty KPI belgilep, qyzmet barysynda sony basshylyqqa alý kerektigin tapsyrdy.

«Naqty ındıkatorlar men oǵan jetý merzimi kórsetilgen jospar jasap, ony baqylaýda ustaý kerek. Ózderińiz biletindeı,, qazir Májiliste jańa Ekologııalyq kodeks jobasy qaralyp jatyr. Ol eń mańyzdy ekologııalyq problemalardy sheshetin qujat. Jańa kodekstiń mańyzdy pýnktteriniń biri – óndiriske eń ozyq tehnologııalardy engizý. Degenmen iri kásiporyndarmen tabıǵatty qorǵaý sharalary boıynsha jumysty qazirden bastaý kerek», - dep atap ótti Maǵzum Myrzaǵalıev.

Mınıstr sala qyzmetkerleriniń jıi semınarlarǵa qatysyp, jetekshi sarapshy mamandardan sabaq alý arqyly biliktiligin arttyrý máselesiniń de mańyzdy ekenine toqtaldy.