Qazaqstanda astyq ımportyna tyıym uzartyldy

Aýyl sharýashylyǵy mınıstrligi bıdaı ımportyna salynǵan tyıymdy uzartty. Alaıda jekelegen sanattarǵa bul talaptyń qatysy joq, dep habarlaıdy QazAqparat. 

 

Syrtqy saýda saıasaty jáne Halyqaralyq ekonomıkalyq uıymdarǵa qatysý máseleleri jónindegi vedomstvoaralyq komıssııanyń 2023 jylǵy 10 tamyzdaǵy sheshimi negizinde «Qazaqstan Respýblıkasynyń aýmaǵyna avtomobıl jáne temir jol kólikterimen bıdaı ákelýge tyıym salý týraly» QR Aýyl sharýashylyǵy mınıstriniń 2023 jylǵy 25 qyrkúıektegi №337 buıryǵymen:

– 2023 jylǵy 11 qazannan bastap úshinshi elderden jáne EAEO elderinen avtomobıl kóligimen Qazaqstan aýmaǵyna bıdaı ákelýge tyıym (SEQ TN: 100119; 100199) 6 aı merzimge uzartyldy;

– lıtsenzııalanǵan elevatorlardyń, astyq óńdeýshilerdiń jáne qus sharýashylyǵy kásiporyndarynyń atyna bıdaı ákelýdi qospaǵanda, úshinshi elderden jáne EAEO elderinen temir jol kóligimen Qazaqstan aýmaǵyna bıdaı ákelýge 6 aı merzimge tyıym (SEQ TN: 100119; 100199) belgilendi.

Osylaısha, bıdaıdyń kezkelgen tutynýshysy ony lıtsenzııalanǵan elevatorlar arqyly ımporttaı alady.

Sondaı-aq, engizilgen shekteýler Qazaqstan aýmaǵy arqyly bıdaıdy temir jol kóligimen tranzıttik tasymaldaýǵa qoldanylmaıtyny atalyp ótken.

Astyq óńdeý jáne qus sharýashylyǵy kásiporyndarynyń tizbesin «Atameken» UKP qalyptastyrady jáne jańartyp otyrady. Lıtsenzııalanǵan elevatorlardyń tizimi https://p-grain-receipt.qoldau.kz/ru/gr-info/granaries saıtynyń derekterine sáıkes jasalady.