Qazaqstanda árbir altynshy kásiporyn Almatydan ashylǵan
Baqytjan Saǵyntaevtyń aıtýynsha, Almatyny damytýdyń negizgi qorǵaýshy kúshi – bıznes jáne adamdar.
Megapolıs elimizdiń eń kreatıvti, bastamashyl jáne bilimdi adamdaryn ózine tartýda.
Búginde qala ekonomıkasynyń 45%-dan astamyn jeke bıznes qalyptastyryp otyr. Qazaqstannyń árbir altynshy kásiporny Almatyda ashylǵan.
Almatyda jumys isteıtin halyqtyń 70 paıyzǵa jýyǵy joǵary bilimdi. Qalada elimizdegi eń úzdik shyǵarmashylyq kadrlar shoǵyrlanǵan, olardy jyl saıyn 39 joǵary oqý oryndary daıyndaıdy.
Qalalyq jáne aımaqtyq baǵdarlamalar aıasynda naqtyly suranysqa ıe mamandar boıynsha jumyssyzdar kásiptik bilim alyp, qaıta daıarlanyp jáne biliktiligin arttyryp jatyr.
Byltyr «Eńbek» baǵdarlamasy boıynsha myńnan astam adam qysqa merzimdi kásiptik oqýdan ótti.
2020 jyly kásipkerlerdi oqytýǵa arnalǵan Edu.almatybusiness portaly iske qosyldy, onda bilim boıynsha 200-den astam vıdeorolık jarııalanǵan.
Portalda 110 myńnan astam qoldanýshy tirkelgen. Bul tájirıbe bıyl da jalǵasady.
«Usaq isterden bastap, biz aýqymdy maqsattardy júzege asyrý boıynsha josparly jáne júıeli jumys isteımiz. Búginde Almatyda aglomeratsııany qosqanda úsh mıllıonnan astam adam turady. Demek, taıaý jyldary ekonomıkanyń edáýir ósýin qamtamasyz etip, qosymsha quny joǵary jáne eksporttyq áleýeti bar jańa sektorlardy jáne myńdaǵan jumys oryndaryn ashyp,eńbek ónimdiligin arttyrýymyz qajet», - dedi qala ákimi Baqytjan Saǵyntaev.
Onyń aıtýynsha, adamı kapıtaldy damytýǵa baǵyttalǵan ekonomıkalyq saıasatta qoldanylatyn tıimdi ádister bıznes júrgizýge qolaıly qala qurýǵa múmkindik berdi.
Megapolıs odan ári damýynda turaqty damý baǵytynda EYDU standarttaryna jáne álemdik ozyq tájirıbege júginetin bolady.
Jergilikti reformalardy júzege asyrýdaǵy jahandyq paıymy Almatynyń 2050 jylǵa deıingi damý strategııasynda kórinis tapqan.
