Qazaqstanda apta ishinde bolǵan kadrlyq taǵaıyndaýlar
ASTANA. KAZINFORM – Aqpannyń alǵashqy aptasynda elimizdiń ishki ister organdarynda jáne túrli memlekettik qurylymdarynda kadrlyq aýys-túıister boldy.
Atyraý oblystyq polıtsııa departamenti bastyǵynyń jańa orynbasary taǵaıyndaldy. Endi bul laýazymdy polıtsııa polkovnıgi Erlan Bıǵambaev atqarady.
Erlan Valerııuly Atyraý qalasynda dúnıege kelgen. Іshki ister organdaryndaǵy eńbek jolyn 2002 jyly bastaǵan. Atyraý qalalyq polıtsııa basqarmasynda basshylyq laýazymdy atqarǵan. Keıin departamentke qarasty jergilikti polıtsııa qyzmeti basqarmasynyń bastyǵy bolyp taǵaıyndalǵan.
Qazir oblystyq polıtsııa departamentin polıtsııa general-maıory Nurhat Orazbaev basqarady. Onyń 6 orynbasary bar.
Batys Qazaqstan oblysy polıtsııa departamenti bastyǵynyń orynbasary laýazymyna Ernar Sultanǵalıev taǵaıyndaldy.
BQO polıtsııa departamentiniń baspasóz qyzmetinen málim etkenindeı, jańa laýazymyna deıin Ernar Sultanǵalıev osy departamentte jergilikti polıtsııa qyzmeti basqarmasynyń bastyǵy bolǵan.
Ernar Sultanǵalıev ishki ister organdarynda 1997 jyldan bastap qyzmet etip keledi. Osy salada birneshe basshylyq qyzmetti atqardy.
Túrkistan oblysy Polıtsııa departamenti bastyǵynyń tergeý jónindegi orynbasary bolyp polıtsııa polkovnıgi Baýyrjan Batyrbekuly Zııataev taǵaıyndaldy.
Túrkistan oblysy Polıtsııa departamentiniń bastyǵy, polıtsııa general-maıory Murat Qabdenov jeke quramǵa jańa orynbasardy tanystyryp, qyzmetine sáttilik tiledi.
Baýyrjan Zııataev Іshki ister organdarynda 1994 jyldan beri qyzmet atqaryp keledi. Q.ıAssaýı atyndaǵy HQTÝ-diń túlegi. Mamandyǵy - zańger. Jedel-tergeý bólimderinde mol tájirıbe jınaqtaǵan. Buǵan deıin Túrkistan oblysy polıtsııa departamentiniń tergeý basqarmasy bastyǵynyń orynbasary, anyqtaý basqarmasynyń bastyǵy, Saıram jáne Tólebı aýdandarynda polıtsııa bóliminiń basshysy qyzmetterin atqarǵan.
Baýyrjan Zııataev QR ІІM-niń medaldarymen, gramotalarymen marapattalǵan.
Al ShQO Polıtsııa departamenti bastyǵynyń birinshi orynbasary laýazymyna polıtsııa polkovnıgi Tókenov Almaz Tilegenuly taǵaıyndaldy.
Ol quqyq qorǵaý organdaryndaǵy qyzmetin 1999 jyly Petropavl qalasy ІІB qylmystyq izdestirý bólimshesiniń jedel ýákili retinde bastaǵan. Keıingi jyldary Uıymdasqan qylmysqa qarsy kúres bólimshelerinde, ІІM ortalyq apparatynda basshylyq laýazymdardy atqaryp, jeke tulǵaǵa qarsy qylmystardy ashý salasynda mamandanǵan.
Qylmystyq izdestirý bólimshelerin basqarý jáne jedel izdestirý jumystaryn júrgizý boıynsha mol tájirıbesi bar. 2022 jyldyń qyrkúıek aıynan bastap ShQO PD bastyǵynyń orynbasary qyzmetin atqarǵan.
Asyljan Ospanuly Qaldarbekov Shymkent qalasy polıtsııa departamenti bastyǵynyń orynbasary qyzmetine taǵaıyndaldy.
Asyljan Qaldarbekov ishki ister organdarynda 2002 jyldan beri qyzmet etip keledi. 2002-2014 jyldar aralyǵynda tergeý salasynda, sonyń ishinde Almaty qalasy ІІD-de túrli basshylyq laýazymdarda jumys istedi.
2014-2019 jyldary Astana qalasy PD Almaty APB-nyń tergeý basqarmasy bastyǵynyń orynbasary jáne Anyqtaý basqarmasynyń bastyǵy qyzmetterin atqardy.
Keıingi ýaqytta Túrkistan oblysy Polıtsııa departamenti bastyǵynyń orynbasary laýazymynda boldy.
Almaty oblysy ákiminiń ókimimen Asqar Toıshybekov oblystyq jumyldyrý daıarlyǵy, aýmaqtyq jáne azamattyq qorǵanys basqarmasynyń basshysy laýazymyna taǵaıyndaldy.
Asqar Toıshybekov 1975 jyly týǵan. Bilimi — joǵary. 1999 jyly QR Іshki ister mınıstrliginiń Almaty tehnıkalyq ınstıtýtyn «órt qaýipsizdigi» mamandyǵy boıynsha bitirgen.
Eńbek jolyn 1995 jyly Almaty oblysy Іshki ister basqarmasynyń memlekettik órtke qarsy qyzmeti Tekeli qalysynyń memlekettik órt qadaǵalaý bóliminiń ınjeneri qyzmetinen bastaǵan. Ár jyldary Almaty oblysynda órt sóndirý jáne avarııalyq-qutqarý qyzmetinde, sondaı-aq tótenshe jaǵdaılar departamentinde ár túrli laýazymdy atqarǵan. 2020 jyldan 2024 jylǵa deıin Almaty oblysy Tótenshe jaǵdaılar departamentiniń basshysy boldy.
Óskemen qalasy ákiminiń orynbasary bolyp Abzal Máýlethanov taǵaıyndaldy.
Abzal Asqaruly Óskemen qalasyndaǵy S.Amanjolov atyndaǵy Shyǵys Qazaqstan ýnıversıtetinde jáne Alikhan Bokeikhan University-de bilim alǵan.
Memlekettik qyzmettegi eńbek ótili – 8 jyl. Ár jyldary Zaısan, Altaı, Úrjar, Glýbokoe aýdandarynda qyzmet etken. Óskemen qalasynyń qarjy bólimin basqarǵan.
Sońǵy jumys orny – Óskemen qalasynyń turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń basshysy.
Ulytaý oblysy Aýyl sharýashylyǵy jáne jer qatynastary basqarmasynyń basshysy bolyp Almat Saýhımov taǵaıyndaldy.
Almat Saýhımov 1985 jyly dúnıege kelgen. Ortalyq-Azııa ýnıversıtetin «Qarjy», Baıqońyrov atyndaǵy Jezqazǵan ýnıversıtetin «Quqyqtaný» jáne Shymkent ýnıversıtetin «Ekonomıka» mamandyǵy boıynsha bitirgen. Eńbek jolyn Sátbaev qalasyndaǵy «Sát Sáýlet» JShS-niń abattandyrý sheberi, dırektor orynbasarynyń mindetin atqarýshy bolyp bastaǵan.
Ol 2007-2022 jyldar aralyǵynda salyq jáne memlekettik kirister júıesinde jumys atqardy. Onyń ishinde Jezqazǵan qalasy boıynsha salyq basqarmasynyń bas mamany, Qaraǵandy oblysynyń Salyq departamentinde basqarma basshysy, Jezqazǵan qalasy boıynsha Memlekettik kirister departamenti basshysynyń orynbasary bolyp qyzmet etti. 2022-2023 jyldary Jezqazǵan qalasy Keńgir selosynyń ákimi boldy. 2023 jyldan bastap búgingi kúnge deıin Sátbaev qalasy ákiminiń orynbasary bolyp jumys istep keldi.
Sonymen birge, Fýtboldan Qazaqstan quramasynyń baspasóz hatshysy qyzmetine Ermuhamed Máýlen taǵaıyndaldy.
Ermuhamed Máýlen QFF-da uzaq jyldan beri jumys istep keledi. Tanymal sport kommentatory 2014 jyly Brazılııada ótken mýndıalda qazaq televızııasy tarıhynda alǵash ret oqıǵa ornynan translıatsııa júrgizdi. 2017-2018 jyldary «Egemen Qazaqstan» gazetiniń sport bóliminiń meńgerýshisi, al 2019 jyly «Habar» agenttiginiń sport bóliminiń prodıýseri boldy. 2020 jyly «Qazsport» telearnasynda arnaıy jobalar redaktory qyzmetin atqarǵan. 2021 jyly Qazaqstan fýtbol federatsııasynyń baspasóz qyzmetin basqardy. 2022-2024 jyldary QFF prezıdenti keńesshisi qyzmetine taǵaıyndaldy.
Al Beıjiń Olımpıadasynyń qola júldegeri Arman Chılmanov Atyraýdaǵy olımpıada rezervin daıyndaý ortalyǵynyń dırektory bolyp taǵaıyndaldy.
Arman Konstantınuly 1984 jyly dúnıege kelgen. Eki joǵary bilimi bar.Taekvondodan 2004 jyly Iranda, 2005 jyly Germanııada ótken halyqaralyq týrnırdiń jeńimpazy atanǵan. Al 2007 jáne 2009 jyldary álem chempıonatynda qola júldegeri bolǵan.
El namysyn Azııa chempıonatynda da sátti qorǵaǵan. Máselen, 2006 jyly Azııa chempıony atansa, 2002, 2008 jyldary Azııa chempıonatynyń qola júldesin 2010, 2012 jyldary kúmis júldesin ıelengen. 2008 jyly Beıjińde ótken Olımpıada oıyndarynda qola medalǵa ıe bolǵan. Qazaqstan Respýblıkasynyń eńbek sińirgen sport sheberi ataǵyn alǵan. «Qurmet» ordenimen marapattalǵan.
2003 jyldan beri sport nusqaýshysy, taekvondodan Qazaqstan Respýblıkasynyń memlekettik jattyqtyrýshysy, Atyraý aımaqtyq sportty damytý ortalyǵy dırektorynyń orynbasary bolǵan Osy kezge deıin Qazaqstan taekvondo federatsııasynyń vıtse-prezıdenti qyzmetin atqarǵan.