Qazaqstanda apta ishinde bolǵan kadrlyq taǵaıyndaýlar
ASTANA. KAZINFORM — Elimizde osy apta ishinde birqatar kadrlyq aýys-túıis boldy.
Apta basynda Almaty qalasynyń ákimi Darhan Satybaldynyń ókimimen qoǵamdyq densaýlyq saqtaý basqarmasynyń basshysy qyzmetine Marat Pashımov taǵaıyndaldy.
Marat Pashımov 1981 jyly 4 qazanda dúnıege kelgen. Medıtsına ǵylymdarynyń kandıdaty. Densaýlyq saqtaý salasynda 2003 jyldan beri eńbek etip keledi. Ár jyldary medbıke, anestezıolog-dáriger bolyp jumys istegen. Sondaı-aq reanımatsııa jáne telemedıtsına bólimshesiniń meńgerýshisi, uıymdastyrý-ádistemelik jumys men tótenshe jaǵdaılar jónindegi bas dárigerdiń orynbasary qyzmetterin atqarǵan. Qalalyq emhanany, oblystyq klınıkalyq aýrýhanany, qoǵamdyq densaýlyq saqtaý basqarmasyn basqarǵan.
2023 jyldan bastap Almaty qalasyndaǵy «Kardıologııa jáne ishki aýrýlar ǵylymı-zertteý ınstıtýty» AQ basqarma tóraǵasy qyzmetin atqarǵan.
Mańǵystaý oblysynyń ákimi Nurdáýlet Qılybaıdyń ókimimen oblystyq aqparat jáne qoǵamdyq damý basqarmasynyń basshysy bolyp Gúlmıra Balǵojaeva taǵaıyndaldy.
Gúlmıra Balǵojaeva 1971 jyly Mańǵystaý oblysynda dúnıege kelgen. Bilimi joǵary. 1993 jyly Atyraý pedagogıkalyq ınstıtýtyn «Orys tili jáne ádebıeti pániniń muǵalimi» mamandyǵy boıynsha támamdaǵan. 2003 jyly Qazaq memlekettik zań akademııasynan «Quqyqtaný» mamandyǵyn alǵan.
Eńbek jolyn 1993 jyly Aqtaý qalasyndaǵy «Tehnıkalyq mektep» oqý-óndiristik birlestiginde orys tili jáne ádebıeti pániniń muǵalimi retinde bastaǵan. 1995–1998 jyldary bilim berý uıymdarynda qazaq tili men ádebıeti pániniń muǵalimi bolyp jumys istedi.
1998–2001 jyldary Ulttyq banktiń Mańǵystaý oblystyq fılıalynda aýdarmashy qyzmetin atqardy. 2001–2002 jyldary Ekonomıkalyq lıtseı dırektorynyń orynbasary boldy.
Memlekettik qyzmettegi jolyn 2003 jyly Mańǵystaý oblysy ishki saıasat departamentinde taldaý jáne monıtorıng bóliminiń bas mamany retinde bastaǵan. Keıin osy departamenttiń jurtshylyqpen baılanys bólimin basqardy. 2005–2009 jyldary oblys ákimi baspasóz qyzmetiniń bas mamany, 2009–2017 jyldar aralyǵynda sol qyzmettiń jetekshisi boldy.
2017–2022 jyldary Mańǵystaý oblysynyń din isteri basqarmasynda túrli bólimderdiń basshysy qyzmetterin atqaryp, dinı birlestiktermen baılanys jáne dinı ekstremızmge qarsy nasıhat jumystaryn úılestirdi.
2022 jyldan osy ýaqytqa deıin Aqtaý qalalyq ishki saıasat jáne tilderdi damytý bóliminiń basshysy bolyp qyzmet etti.
Aqtaý qalasy ákiminiń orynbasary bolyp Bekzat Júsip taǵaıyndaldy.
Bekzat Júsip 1989 jyly Mańǵystaý oblysy Mańǵystaý aýdany Ushtaǵan aýylynda dúnıege kelgen.
Ál-Farabı atyndaǵy Qazaq ulttyq ýnıversıtetiniń jýrnalıstıka fakýltetin, Qazaq ekonomıka, qarjy jáne halyqaralyq saýda ýnıversıtetin, Ulybrıtanııadaǵy Shyǵys Anglııa ýnıversıtetiniń magıstratýrasyn támamdaǵan. «Bolashaq» halyqaralyq baǵdarlamasynyń túlegi.
Eńbek jolyn 2006 jyly «Qazaqstan» RTRK» AQ Mańǵystaý oblystyq fılıalynda redaktor qyzmetinen bastaǵan.
2009-2013 jyldary respýblıkalyq telearnalarda jumys istedi.
2013-2016 jyldary — Qyzylorda oblysy ákiminiń baspasóz hatshysy — bas ınspektor boldy.
2019-2021 jyldary — «Qazaqstan» RTRK» AQ Mańǵystaý oblystyq fılıalynyń dırektory.
2021-2022 jyldary Qazaqstan Respýblıkasy Memlekettik hatshysynyń Hatshylyǵy meńgerýshisiniń orynbasary boldy.
2022–2023 — Premer-mınıstr keńsesi basshysynyń orynbasary.
2023–2024 — «Qazcontent» AQ basqarma tóraǵasy laýazymdarynda boldy.
Qaraǵandy oblysynyń memlekettik múlik jáne jekeshelendirý departamentiniń basshysy bolyp Ardaq Tóleýhanuly Dosmaqov taǵaıyndaldy.
Jalpy eńbek ótili — 24 jyl. Bilimi joǵary. E.A. Bóketov atyndaǵy Qaraǵandy memlekettik ýnıversıtetin bitirgen.
Memlekettik múlik jáne jekeshelendirý komıtetiniń júıesinde 18,7 jyl jumys isteıdi. Eńbek jolyn bas mamannan basshynyń orynbasaryna deıin ótti.
Sońǵy 5 jyl 5 aıda Qaraǵandy memlekettik múlik jáne jekeshelendirý departamenti basshysy orynbasarynyń qyzmetin atqarǵan.
Qaraǵandy oblysy ákiminiń orynbasary bolyp Rýslan Aıtykenuly Kenjebekov taǵaıyndaldy.
Jańa qyzmetinde ol agroónerkásiptik keshen, veterınarııa jáne tabıǵı resýrstardy paıdalaný salalaryna jetekshilik etetin bolady.
Rýslan Kenjebekov — Qaraǵandy oblysy Aqtoǵaı aýdany Qyzylaraı aýylynyń týmasy. Memlekettik qyzmette 2002 jyldan beri eńbek etip keledi. Eńbek jolyn Abaı aýdany ákiminiń apparatynda bastaǵan. Keıin Qaraǵandy oblysynyń Ádilet departamentinde ártúrli laýazymdardy atqardy. Oblystyq monopolııaǵa qarsy ınspektsııany, sondaı-aq Básekelestikti qorǵaý jáne damytý departamentin basqarǵan.
Sondaı-aq Qazaqstan Respýblıkasy Prezıdenti Ákimshiliginiń Memlekettik qyzmet jáne kadr saıasaty bóliminde keńesshi qyzmetin atqarǵan.
2023–2024 jyldary Aqtoǵaı aýdanynyń ákimi boldy. Keıin QR Premer-Mınıstri Keńsesiniń Óńirlik damý jáne baqylaý bóliminde óńirlik ınspektor qyzmetin atqardy.
2024 jyldyń qyrkúıeginen bastap jańa taǵaıyndaýǵa deıin «ORKENDEU» bıznes pen ınfraqurylymdy damytý qaýymdastyǵy» ZTB janyndaǵy Monopolııaǵa qarsy saıasat komıtetin basqardy.
Jambyl oblysy boıynsha memlekettik múlik jáne jekeshelendirý departamentiniń basshysy bolyp Ǵanı Qoıbaǵarov taǵaıyndaldy.
Onyń eńbek ótili - 21 jyl. Almaty Ekonomıka jáne statıstıka akademııasy men Taraz ınnovatsııalyq-gýmanıtarlyq ýnıversıtetin támamdaǵan.
MMJK júıesinde 18 jyl 7 aı jumys istep keledi. Qyzmetti bas mamannan bastap departament basshynyń orynbasaryna deıin kóterilgen.
Keıingi 5,5 jylda Jambyl oblysy boıynsha memlekettik múlik jáne jekeshelendirý departamenti basshysynyń orynbasary bolyp eńbek etti.
Shymkent qalasy densaýlyq saqtaý basqarmasy basshysynyń mindetin atqarýshy bolyp Sáýle Dúısenbaeva taǵaıyndaldy.
Sáýle Sansyzbaıqyzy Dúısenbaeva 1974 jyly 7 maýsymda OQO, Maqtaral aýdany, Ilıchevka aýylynda dúnıege keldi. Bilimi — joǵary. Ol Qyrǵyz medıtsınalyq akademııasyn (1991 — 1997 j. j.) emdeý isi mamandyǵy boıynsha támamdaǵan, biliktiligi-dáriger. Sonymen qatar Qazaqstan ınjenerlik-pedagogıkalyq Halyqtar dostyǵy ýnıversıtetinde (2013 — 2015 j. j.), «Mıras» ýnıversıtetinde oqyǵan.
Eńbek jolyn 1997 jyly Ózbekstan Respýblıkasy Jızzaq qalasynda Ana men bala ortalyǵynyń akýsherııa jáne gınekologııa boıynsha dáriger-ınterni bolyp bastaǵan.
Keıinnen 1998 jyly Ózbekstan Respýblıkasy, Jızaq oblysy Gagarın qalasyndaǵy «Myrzashol» emhanasynda akýsher-gınekolog dárigeri, gınekologııa bólimshesiniń meńgerýshisi, bas akýsher-gınekologi, ÝDZ dárigeri, perzenthana bóliminiń meńgerýshisi qyzmetterin atqarǵan.
2009 jyly Atyraý qalasyndaǵy oblystyq perzenthanada akýsher-gınekolog dárigeri qyzmetinde boldy.
2010 jyly Astana qalasynyń №3 qalalyq perzenthanasynda akýsher-gınekolog bolyp jumys istedi.
2011 jyldan bastap Shymkent qalasyndaǵy №4 oblystyq perınataldyq ortalyǵynyń 2 akýsherlik-fızıologııalyq bólimshesiniń meńgerýshisi boldy.
2017 jyly Shymkent qalasy №2 Oblystyq perınataldyq ortalyǵy bas dárigeriniń orynbasary, gınekologııa bólimshesiniń meńgerýshisi qyzmetin atqardy.
2018 jyly Shymkent qalalyq perınataldyq ortalyǵynyń bas dárigeriniń mindetin atqarýshysy boldy.
2021 jyldan bastap Shymkent qalasy densaýlyq saqtaý basqarma basshysynyń orynbasary laýazymynda qyzmet atqardy.
Shymkent qalasy memlekettik múlik jáne jekeshelendirý departamentiniń basshysy bolyp Ǵalym Qasymbekov taǵaıyndaldy.
Jalpy eńbek ótili - 21 jyl. Bilimi joǵary. Qazaq memlekettik zań akademııasyn bitirgen.
Memlekettik múlik jáne jekeshelendirý komıtetiniń júıesinde 10 jyl jumys isteıdi.
Eńbek jolyn bas mamannan bastap basshynyń orynbasaryna deıingi satydan ótti.
Sońǵy 5 jyl 6 aıda Shymkent qalasy memlekettik múlik jáne jekeshelendirý departamenti basshysy orynbasarynyń qyzmetin atqarǵan.
Qazaqstan Respýblıkasynyń eńbek sińirgen sport sheberi, Olımpıada oıyndarynyń kúmis júldegeri Ashat Jitkeev buǵan deıin atqaryp kelgen bas hatshy qyzmetinen bosap, Dzıýdo federatsııasynyń vıtse-prezıdenti bolyp taǵaıyndaldy.
Aıta keteıik, Ashat Jitkeev 2011–2012 jyldary Qazaqstannyń erler ulttyq quramasyn basqarǵan, al 2012 jyldan 2019 jylǵa deıin Dzıýdo federatsııasynyń damý jónindegi dırektory qyzmetin atqarǵan.
2023 jyldyń sáýir aıynan bastap Azııa dzıýdo odaǵynyń referı-dırektory laýazymynda jumys istep keledi.
Bos qalǵan bas hatshy qyzmetine Tımýr Bolat taǵaıyndaldy.