Qazaqstanda apta ishinde bolǵan kadrlyq taǵaıyndaýlar
ASTANA. KAZINFORM — Ótip bara jatqan apta ishinde Memleket basshysynyń Jarlyǵymen birqatar eldegi Qazaqstannyń Tótenshe jáne Ókiletti elshileri taǵaıyndaldy. Sondaı-aq ortalyq jáne jergilikti bılikte de birqatar kadrlyq aýys-túıis boldy.
Atap aıtqanda, Memleket basshysynyń Jarlyqtarymen: Almas Seıtaqynov Qazaqstan Respýblıkasynyń Mońǵolııadaǵy Tótenshe jáne Ókiletti elshisi; Sergeı Aleksandrovıch Vıktorov Qazaqstan Respýblıkasynyń Shrı-Lanka Demokratııalyq Sotsıalıstik Respýblıkasyndaǵy Tótenshe jáne Ókiletti elshisi; Qazaqstan Respýblıkasynyń Shvetsııa Koroldigindegi Tótenshe jáne Ókiletti elshisi Oljas Muhamedǵalymuly Súleımenov Qazaqstan Respýblıkasynyń Danııa Koroldigindegi Tótenshe jáne Ókiletti elshisi qyzmetin qosa atqarýshy laýazymyna taǵaıyndaldy.
Memleket basshysynyń ókimderimen: Tımýr Mıftahuly Jantıkın men Áset Keńesbekuly Mahambetov Qazaqstan Respýblıkasynyń Atom energııasy jónindegi agenttigi tóraǵasy qyzmetine taǵaıyndaldy.
Sonymen qosa Sergeı Lı Aýyl sharýashylyǵy mınıstrliginiń apparat basshysy boldy.
Sergeı Mıhaılovıch Lı 1973 jyly dúnıege kelgen. Sankt-Peterbýrgtegi RF ІІM Іshki áskerleriniń joǵary áskerı komandalyq ýchılışesin «quqyqtaný» mamandyǵy boıynsha, sondaı-aq Qazaq-Reseı halyqaralyq ýnıversıtetin «esep jáne aýdıt» mamandyǵy boıynsha támamdaǵan. Zań ǵylymdarynyń kandıdaty.
Eńbek jolyn bank salasynda bastaǵan. «Kazagroprombank» AQ Aqtóbe oblystyq fılıalynda jáne «Kazkommertsbank» AQ Aqtóbe fılıalynda zańger bolyp jumys istegen. Salyq qyzmeti organdarynda qyzmet atqarǵan: bas maman, quqyqtyq qamtamasyz etý bóliminiń bastyǵy, Aqtóbe oblysy salyq departamentiniń quqyqtyq qamtamasyz etý basqarmasynyń bastyǵy, sondaı-aq Aqtóbe qalasynyń salyq basqarmasyn basqarǵan. Aqtóbe oblysy boıynsha sot aktilerin oryndaý departamentin basqarǵan, QR Jeke sot oryndaýshylary respýblıkalyq palatasynyń basqarma tóraǵasy qyzmetin atqarǵan, 2019 jyldyń qyrkúıeginen bastap Aqtóbe qalasy ákiminiń orynbasary, Saýda jáne ıntegratsııa mınıstrliginiń zań qyzmeti departamentiniń dırektory laýazymdaryn atqarǵan. Jańa qyzmetke taǵaıyndalǵanǵa deıin «QazExpoCongress» UK» AQ basqarma tóraǵasynyń orynbasary qyzmetin atqardy.
Elorda ákiminiń orynbasary bolyp 38 jastaǵy Іlııas Baǵdáýletov taǵaıyndaldy.
Ol 2010-2020 jyldar aralyǵynda memlekettik qurylymdarda túrli qyzmetter atqarǵan. 2020 jyldyń maýsymynan 2022 jyldyń qańtaryna deıin Astana qalasy ákiminiń keńesshisi boldy. Keıingi jyldary memlekettik qurylymdarda túrli qyzmetterde eńbek etken.
Buǵan deıin Aqtóbe oblystyq din isteri basqarmasynda basshy bolǵan Álimbek Turalıev jańa qyzmetke aýysty.
Álimbek Turalıev Aqtóbe oblysynda dúnıege kelgen. Q.Jubanov atyndaǵy Aqtóbe memlekettik ýnıversıtetin «Memlekettik jáne jergilikti basqarý», 2019 jyly — Qazaq-Orys Halyqaralyq ýnıversıtetin «Quqyqtaný» mamandyqtary boıynsha támamdaǵan. Eńbek jolyn 2008 jyly Aqtóbe qalalyq ishki saıasat bóliminiń jetekshi mamany bolyp bastaǵan.
2011-2013 jyldary aralyǵynda Aqtóbe qalalyq ekonomıka jáne bıýdjettik josparlaý bóliminiń ekonomıkalyq josparlaý jáne esep sektorynyń bas mamany, 2013-2015 jyldary aralyǵynda Aqtóbe qalalyq ishki saıasat bóliminiń quqyqtyq-uıymdastyrý suraǵy boıynsha jastar saıasaty jáne qoǵamdyq birlestiktermen jumys jónindegi sektor meńgerýshisi boldy. Al 2015-2019 jyldary aralyǵynda Aqtóbe oblysy ákimi apparatynyń túrli laýazymdarynda jumys istedi. 2019 jyldan 2025 jyldyń aqpan aıyna deıin Aqtóbe oblysynyń din isteri basqarmasynyń basshysy qyzmetin atqardy.
Sonymen qatar Jetisý oblysy ákiminiń ókimimen Asqar Maratuly Sadyqov Jetisý oblysynyń densaýlyq saqtaý basqarmasynyń basshysy bolyp taǵaıyndaldy.
Asqar Maratuly Sadyqov 1981 jyly týǵan. Joǵary bilimdi. Qazaq ulttyq medıtsına ýnıversıtetin ýrolog dáriger mamandyǵy boıynsha bitirgen.
Eńbek jolyn Almaty memlekettik dárigerlerdi jetildirý ınstıtýtynda ýrologııa mamandyǵy boıynsha ordınatýrada bastady.
Ár jyldarda Almaty qalasynyń Ortalyq qalalyq klınıkalyq aýrýhanasynda ýrolog dáriger, «Akademık B. Jarbosynov atyndaǵy ýrologııa ǵylymı ortalyǵy» AQ kishi ǵylymı qyzmetkeri, ýrolog dárigeri, operatsııa blogynyń meńgerýshisi, jalpy ýrologııa bólimi meńgerýshisiniń mindetin atqarýshy, «Astana qalasyndaǵy ulttyq ǵylymı medıtsınalyq ortalyǵy» AQ ýrologııa, hrırýrgııa bólimderiniń ýrolog dárigeri, «Taldyqorǵan qalalyq kópsalaly aýrýhanasy» ShJQ MKK ýrologııa bóliminiń meńgerýshisi, dırektordyń emdeý isi jónindegi orynbasary, «Kóksý aýdanynyń ortalyq aýdandyq aýrýhanasy» ShJQ MKK dırektory qyzmetterin atqardy.
2022 jyldyń qyrkúıeginen «Taldyqorǵan qalalyq kópsalaly aýrýhanasy» ShJQ MKK dırektory bolǵan.
Semeı qalasy ákiminiń orynbasary bolyp Azamat Salımbaev taǵaıyndaldy. Azamat Serikboluly 1985 jyly Abaı oblysy Besqaraǵaı aýdanynda dúnıege kelgen. 2007 jyly H.Dosmuhamedov atyndaǵy Atyraý ýnıversıtetin «Ekonomıka», 2024 jyly QR Prezıdenti janyndaǵy Memlekettik basqarý akademııasy «Ekonomıka» magıstri retinde támamdady.
Eńbek jolyn 2007 jyly Atyraý oblysy Energetıka jáne kommýnaldyq sharýashylyq departamentinde qarjy bóliminiń bas mamany retinde bastady.
2008-2014 jyldary Qazaqstan Respýblıkasy Ekonomıka jáne bıýdjettik josparlaý mınıstrliginde kólik, ónerkásip jáne otyn-energetıka salasyndaǵy bıýdjettik josparlaý baǵytynda sarapshy, bas sarapshy jáne basqarma basshysy qyzmetterin atqardy.
2014-2020 jyldary Qarjy mınıstrliginiń qurylymdarynda otyn-energetıkalyq keshenniń bıýdjetin josparlaý salasynda basqarýshylyq qyzmette boldy.
2020-2025 jyldary Atyraý oblysy ákimdiginde birqatar jaýapty laýazymdy atqardy. Atap aıtqanda, Ekonomıka jáne bıýdjettik josparlaý basqarmasyn, Qarjy basqarmasyn jáne Memlekettik satyp alý jáne kommýnaldyq menshik basqarmasyn basqardy.
Tokıo Olımpıadasynyń qola júldegeri Darhan Asadilov karateden Qazaqstan ulttyq quramasynyń bas bapkeri atandy.
Qazaqstan karate federatsııasynan málim etkenindeı, Darhan kásibı sportta aıtýly tabysqa qol jetkizgen. Bul rette Tokıo Olımpıadasyndaǵy (-60 kg) qola júldeni, álem chempıonatynyń kúmisi (2008) men qolasyn (2018), Gýanchjoýdaǵy Azııa oıyndarynyń altynyn atap aıtýǵa bolady.
Sondaı-aq ol — sporttyń osy túrindegi eń bedeldi jarys Karate-1 Premer-lıga básekesiniń 8 dúrkin jeńimpazy.
Darhan Asadilov osyǵan deıin Shymkent qalasyndaǵy sport mektebinde jáne Qazaqstan jastar qurama komandasynda jattyqtyrýshy boldy.
Qýanysh Qabdolov «Atyraý» fýtbol klýby bas bapkeriniń mindetin atqarýshy bolyp bekitildi.
37 jastaǵy jergilikti maman 2009-2012 jyldar aralyǵynda «Atyraýdyń» jastar komandasynda bas bapkerdiń kómekshisi bolyp eńbek etti.
2013 jyly «Atyraý» fýtbol ortalyǵynyń basshysy bolyp taǵaıyndalyp, onyń tusynda 1999 jylǵy jasóspirimder komandasy Qazaqstan birinshiliginde jeńimpaz atandy.
2014-2020 jyldar aralyǵynda Qýanysh Kenjáliuly «Atyraý» negizgi komandasynyń bapkerlik shtabynda qyzmet etip, bas bapker kómekshisi jáne bas jattyqtyrýshy mindetin atqardy. Sol ýaqytta «munaıshylar» eki márte Qazaqstan kýbogynyń fınalyna (2017 jáne 2019 jyldary) shyqty.
Keıinnen ol 2021-2022 jyldar aralyǵynda túrkistandyq «Turannyń» bas bapkerine kómektesip, sodan soń komanda tizginin ózi de ustady.
Al byltyrǵy maýsymda aqtaýlyq «Kaspııdiń» bas bapkeri retinde birinshi lıganyń qola medalin jeńip aldy. Jas maman bıyl «Atyraý» QJL komandalarynyń úılestirýshisi retinde qyzmet atqardy.
Buǵan deıin Serik Sápıev Ulttyq Sýrdlımpıada komıtetiniń prezıdenti bolyp saılanǵany belgili boldy.
Aıta keteıik, jaqynda Kazinform agenttigi jańa «Málimet» jobasyn iske qosty. «Málimet» − Qazaqstannyń medıanaryǵynda alǵash ret usynylǵan jańa aıdar, onda saıasat, ekonomıka, bıznes, ǵylym, mádenıet sekildi túrli salada el damýyna eleýli úles qosqan tanymal qazaqstandyqtardyń ómirbaıany men qyzyqty málimetteri jarııalanady.