Qazaqstanda apta ishinde bolǵan kadrlyq aýys-túıis

ASTANA. KAZINFORM – Ótip bara jatqan apta ishinde Memleket basshysy birqatar taǵaıyndaý jasady. Sonymen qatar ortalyq jáne jergilikti atqarýshy organdardaǵy laýazymdarǵa jańa qyzmetkerler keldi.

Memleket basshysynyń Jarlyǵymen Darhan Amangeldiuly Satybaldy Qazaqstan Respýblıkasy Prezıdentiniń Ákimshiligi Basshysynyń birinshi orynbasary bolyp taǵaıyndaldy. 

Darhan Satypaldy 1974 jyly Ońtústik Qazaqstan oblysynda týǵan. S.Seıfýllın atyndaǵy Aqmola aýylsharýashylyǵy ınstıtýtyn, Qazaq gýmanıtarlyq zań ýnıversıtetin bitirgen. Ekonomıka ǵylymdarynyń kandıdaty.

Eńbek jolyn 1996 jyly Ońtústik Qazaqstan oblysynyń Keles aýdanynyń «Keles» kommýnaldyq kásipornynda bastaǵan. 2000-2006 jyldary Qarjy mınıstrliginde, Prezıdenttiń Іs basqarmasynda ártúrli laýazymdarda qyzmet atqarǵan. 2007-2010 jyldary Bilim jáne ǵylym mınıstrliginiń Bıýdjet jáne Qarjy departamentteri dırektorynyń orynbasary, Ǵylym komıteti tóraǵasynyń orynbasary bolǵan.

2022 jylǵy 31 tamyzdan Túrkistan oblysynyń ákimi qyzmetin atqardy.

***

Memleket basshysynyń Jarlyǵymen Nuralhan Oralbaıuly Kósherov Túrkistan oblysynyń ákimi laýazymyna taǵaıyndaldy. 

N. Kósherov 1984 jyly dúnıege kelgen. 2005 jyly "Ekonomıst" mamandyǵy boıynsha M.Áýezov atyndaǵy Ońtústik Qazaqstan memlekettik ýnıversıtetin bitirgen. 2007 jyly Qazaq gýmanıtarlyq zań ýnıversıtetin "Zańtaný bakalavry" mamandyǵy boıynsha, 2019 jyly Qazaqstan Respýblıkasy Prezıdentiniń janyndaǵy Memlekettik basqarý akademııasynyń magıstratýrasyn bitirgen.

Eńbek jolyn 2005 jyly bastaǵan. 2008 jyldan bastap 2015 jylǵa deıin memlekettik kirister organdarynda túrli laýazymdarda jumys istedi. 2015-2018 jyldary Shymkent qalasy ákiminiń orynbasary boldy.

***

Memleket basshysynyń Jarlyǵymen Erlan Sársembaev Ádilet mınıstri bolyp taǵaıyndaldy.

Erlan Jaqsylyquly Sársembaev 1975 jyly Almaty oblysy Talǵar aýdany Oktıabr aýylynda dúnıege kelgen. 1997 jyly Almaty energetıka jáne baılanys ınstıtýtyn «Radıoınjener» mamandyǵy boıynsha, al 2000 jyly D.Qonaev atyndaǵy gýmanıtarlyq ýnıversıtetti bitirgen. 2002 jyldan 2005 jylǵa deıin Premer-mınıstr keńsesiniń qorǵanys jáne quqyqtyq tártip bóliminiń keńesshisi, sektor meńgerýshisi qyzmetin atqardy. 2005 jyldan 2011 jylǵa deıin Senat apparatynda jumys istedi. Halyqaralyq ister, qorǵanys jáne qaýipsizdik komıtetimen ózara is-qımyl jónindegi bólim meńgerýshisiniń orynbasary, sondaı-aq áleýmettik-mádenı damý komıtetimen ózara is-qımyl jónindegi bólim meńgerýshisi laýazymdaryn atqardy.

2023 jyldyń 1 qańtarynan bastap Konstıtýtsııalyq Sottyń sýdıasy bolyp jumys istedi.

***

Memleket basshysynyń kelisimimen Bas Prokýrordyń buıryǵymen aǵa ádilet keńesshisi Marat Baıanuly Ábishev Aqtóbe oblysynyń prokýrory bolyp taǵaıyndaldy. 

M.B. Ábishev 1979 jyly 5 qyrkúıekte Qaraǵandyda dúnıege kelgen. Prokýratýra organdaryndaǵy qyzmetin 2000 jyly Qaraǵandy oblysynyń Jezqazǵan qalasy prokýrorynyń kómekshisi bolyp bastaǵan. Keıin Bas prokýratýrada prokýror, sodan keıin Azamattyq jáne ákimshilik ister boıynsha sot aktileri men atqarýshylyq is júrgizýdiń zańdylyǵyn qadaǵalaý departamentiniń basqarma prokýrory qyzmetterin atqarǵan. Sondaı-aq, Shyǵys Qazaqstan oblysy Zyrıan aýdandyq sotynyń sýdıasy bolyp jumys istegen. Ár jyldary Bas prokýratýranyń Sottarda memleket múddesin qorǵaý departamentiniń aǵa prokýrory, bólim basshysy, departament basshysynyń orynbasary, Qostanaı oblysy prokýrorynyń orynbasary jáne birinshi orynbasary, sondaı-aq Bas Prokýror Apparaty basshysynyń orynbasary laýazymdarynda qyzmet etti.

***

Osy aptada Petropavl qalasy ákiminiń orynbasary qyzmetine Marlen Sandybaev keldi. https://kaz.inform.kz/news/petropavl-kalasi-akmnn-orinbasari-tagayindaldi-fb3698/

Marlen Baǵytbekuly 1984 jyldyń 8 qańtarynda Qostanaı oblysy Arqalyq qalasynda dúnıege keldi. A.Baıtursynov atyndaǵy Qostanaı memlekettik ýnıversıtetin «ıÝrısprýdentsııa», K.Saǵadıev atyndaǵy halyqaralyq bıznes ýnıversıtetin «Memlekettik jergilikti basqarý» mamandyǵy boıynsha bitirgen.

Eńbek jolyn 2008 jyly prokýratýra organdarynan bastaǵan. Ár jyldary Qostanaı qalasy ákimdiginde, Sarykól aýdany ákiminiń apparatynda ártúrli laýazymdarda qyzmet atqarǵan. Osy taǵaıyndaýǵa deıin Marlen Sandybaev Qostanaı oblysy Mendiqara aýdany ákiminiń orynbasary qyzmetin atqardy.

***

QR Mádenıet jáne aqparat mınıstriniń buıryǵymen Muhametqalı Rınat Zákıuly Mádenıet jáne aqparat mınıstriligi apparatynyń basshysy laýazymyna taǵaıyndaldy. 

R. Muhametqalı 1981 jyly týǵan. M. H. Dýlatı atyndaǵy Taraz memlekettik ýnıversıtetin «quqyqtaný» mamandyǵy boıynsha bitirgen. 2002-2004 jyldary jeke jáne memlekettik uıymdarda jumys istegen. 2004-2009 jyldary Ádilet mınıstrliginiń zańnama departamentinde jetekshi maman, bas maman, basqarma basshysynyń orynbasary, basqarma basshysy laýazymdaryn atqarǵan.

2022-2023 jyldary Prezıdent Ákimshiligi basshysynyń hatshylyǵynyń meńgerýshisi qyzmetin atqarǵan. 2023 jyldyń qańtarynan bastap Qostanaı oblysy ákiminiń orynbasary laýazymynda jumys istegen.

***

QR Ulttyq qaýipsizdik komıteti tóraǵasynyń buıryǵymen Shymkent qalasy boıynsha Ulttyq qaýipsizdik komıteti departamentiniń bastyǵy laýazymyna Rýslan Temirǵalıuly Seısembaev taǵaıyndaldy. 

General-maıor Rýslan Seısembaev QR Ulttyq qaýipsizdik komıtetiniń Akademııasyn bitirgen. 1997 jyldan 2008 jylǵa deıin Ulttyq qaýipsizdik organdarynda ofıtserlik laýazymdarda qyzmet etti, al 2008 jyldan 2023 jylǵa deıin osy salada basshylyq qyzmetter atqardy. 2023 jyldyń sáýirinen 2024 jyldyń qyrkúıegine deıin Rýslan Seısembaev QR UQK tóraǵasynyń orynbasary jáne terrorǵa qarsy qyzmet bastyǵynyń mindetin atqardy.

***

Bul aptada Shymkent qalasy TJD bastyǵynyń orynbasarlary taǵaıyndaldy. 

Atap aıtqanda, Azamattyq qorǵaý polkovnıgi Bekzat Seıtbekuly Kambarov Shymkent qalasy TJD bastyǵynyń birinshi orynbasary laýazymyna keldi. B. Kambarov 1978 jyly OQO, Saryaǵash aýdany, Abaı aýylynda dúnıege kelgen. Azamattyq qorǵaý organdarynda 2004 jyldyń sáýir aıynan bastap qyzmet atqarady.

Azamattyq qorǵaý polkovnıgi Ogaı Sergeı Afanasevıch Shymkent qalasy TJD bastyǵynyń orynbasary laýazymyna taǵaıyndaldy.

Ogaı Sergeı Afanasevıch 1981 jyly Qyzylorda oblysy, Qarmaqshy aýdanynda dúnıege kelgen. Azamattyq qorǵaý organdarynda 2005 jyldyń jeltoqsan aıynan bastap jumys istep keledi.

Erbolat Aqanuly Kısykov Shymkent qalasy TJD bastyǵynyń orynbasary laýazymyna taǵaıyndaldy. E. Kısykov 1969 jyly Qostanaı oblysy, Jarqaıyn kentinde dúnıege kelgen. Memlekettik qyzmette eńbek etkenine 12 jyl tolǵan.

***

Mańǵystaý oblysy TJD bastyǵynyń birinshi orynbasary, Aqtaý qalasy TJB bastyǵy orynbasary jáne Órt sóndirý jáne avarııalyq qutqarý jumystaryn uıymdastyrý basqarmasynyń bastyǵy taǵaıyndaldy. 

Azamattyq qorǵaý podpolkovnıgi Mırbek Karaev Amanqosuly Mańǵystaý oblysy Tótenshe jaǵdaılar departamenti bastyǵynyń birinshi orynbasary laýazymyna taǵaıyndaldy.

Óziniń eńbek jolyn 2002 jyldyń jeltoqsanynan bastap 2004 jylǵy qarashaǵa deıin QR Qarýly kúshter qatarynda qyzmet etýden bastady. 2021 jyldyń qyrkúıeginen bastap 2025 jyldyń qańtaryna deıingi aralyqta QR TJM Mańǵystaý oblysy Tótenshe jaǵdaılar departamenti «Órt sóndirý jáne avarııalyq qutqarý qyzmeti (Aqtaý qalasy)» RMM bastyǵy qyzmetin atqarǵan.

Aqtaý qalasy Tótenshe jaǵdaılar basqarmasy bastyǵynyń orynbasary bolyp azamattyq qorǵaý maıory Beken Baltabaıuly Demeshov taǵaıyndaldy.

B. Baltabaıuly 1992 jyly 21 qarashada Mańǵystaý oblysy Aqtaý qalasynda dúnıege kelgen. 2014 jyly Kókshetaý tehnıkalyq ınstıtýtyn bitirgen. 2024 jyly maýsym aıynan bastap «Mańǵystaý oblysy TJD ÓSjAQJQ (Aqtaý qalasy)» RMM bastyǵynyń orynbasary laýazymynda jumys istegen.

Órt sóndirý jáne avarııalyq qutqarý jumystaryn uıymdastyrý basqarmasynyń bastyǵy bolyp azamattyq qorǵaý maıory Berik Hadjı-Rahımuly Búrkitov taǵaıyndaldy.

B. Búrkitov 1988 jyly 18 qarashada Mańǵystaý oblysy Aqtaý qalasynda dúnıege kelgen. 2016 jyly Kókshetaý tehnıkalyq ınstıtýtyn bitirgen. 2023 jyly sáýirinen bastap «Mańǵystaý oblysy TJD ÓSjAQJQ (Aqtaý qalasy)» RMM bastyǵynyń orynbasary boldy.

***

Atyraý oblystyq ekologııa departamentine jańa basshy keldi. Bul laýazymǵa Asqar Júsipov taǵaıyndaldy. 

Asqar Bolatuly 1988 jyly Qostanaı oblysynyń Jangeldın aýdanyndaǵy Torǵaı selosynda dúnıege kelgen. 2008 jyly Qostanaı áleýmettik-tehnıkalyq kolledjin, 2013 jyly Quqyqtanýodaǵynyń Qaraǵandy ekonomıkalyq ýnıversıtetin quqyqtaný mamandyǵymen bitirgen.

Eńbek jolyn 2010 jyly Qostanaı oblysyndaǵy Jangeldın aýdandyq ádilet basqarmasynda bastaǵan. Osy kezge deıin Ekologııa jáne tabıǵı resýrstar mınıstrliginde Ekologııalyq retteý jáne baqylaý komıtetiniń quqyqtyq qamtamasyz etý basqarmasyna basshylyq etken.

***

Osy aptada Aqtóbe oblystyq aýyl sharýashylyǵy basqarmasynyń basshysy qyzmetine Asqar Júsibalıev taǵaıyndaldy. 

Ol buǵan deıin oblystyq tabıǵı resýrstar jáne tabıǵatty paıdalanýdy retteý basqarmasynyń basshysy qyzmetin atqardy.

Asqar Júsibalıev 1963 jyly Aqtóbe oblysynyń Oıyl aýdanynda dúnıege kelgen. 1985 jyly Batys Qazaqstan aýyl sharýashylyǵy ınstıtýtyn «Agronomııa», 2008 jyly Almaty ekonomıka jáne statıstıka akademııasyn «Esep jáne aýdıt», 2020 jyly Q.Jubanov atyndaǵy Aqtóbe óńirlik memlekettik ýnıversıtetin «Quqyqtaný» mamandyqtary boıynsha bitirgen. Eńbek jolyn 1980 jyly Aqtóbe oblysynyń Isataı sovhozynda jumysshy bolyp bastaǵan.

***

Sultan Amanchın Aqtóbe oblystyq memlekettik sáýlet-qurylys baqylaý basqarmasynyń basshysy qyzmetine taǵaıyndaldy.

Sultan Amanchın 2013 jyly Aqtóbe sáýlet-qurylys kolledjin «Sáýlet», 2016 jyly Qazaq-orys halyqaralyq ýnıversıtetin «Qurylys» mamandyqtary boıynsha támamdaǵan.

***

Shyǵys Qazaqstan oblysy tabıǵı resýrstar jáne tabıǵat paıdalanýdy retteý basqarmasynyń basshysy bolyp Arman Esentaev taǵaıyndaldy. Ol buǵan deıin atalǵan basqarma basshysynyń orynbasary qyzmetin atqarǵan. 

2004 jyly S.Amanjolov atyndaǵy Shyǵys Qazaqstan memlekettik ýnıversıtetin, al 2011 jyly Qazaqstan-Amerıkandyq erkin ýnıversıtetin aıaqtady. Eńbek jolyn ShQO jer qatynastary basqarmasynda jetekshi maman bolyp bastaǵan.

***

Osy aptada Canat Shalekenov «Aqtóbe» fýtbol klýbynyń basqarma tóraǵasy qyzmetine taǵaıyndaldy.

Sanat Shalekenov 2007 jyldan bastap «Aqtóbe-Jas» komandasynda oınady. 2013-2014 jyldary aralyǵynda negizgi quramǵa shaqyrtý aldy. Sondaı-aq, mansabynda «Aqjaıyq», «Tobyl», «Atyraý», «Kaspıı» komandalarynyń quramynda oınady. «Qazaqstan U-21» jastar quramasyna da shaqyryldy. Qorǵaýshy bolyp oınaǵan Sanat Shalekenov 2010 jyly «Tobyl» FK sapynda, 2013 jyly «Aqtóbe» FK sapynda fýtboldan Qazaqstan Premer-lıgasynyń chempıony atandy.

***

Qazaqstandyq bapker Qaırat Nurdáýletov bıyl Birinshi lıgada oınaıtyn pavlodarlyq «Ertis» fýtbol klýbynyń bas bapkeri atandy.

1982 jyly dúnıege kelgen ol kásibı oıynshy retinde «TsSKA-Qaırat», «Esil-Bogatyr», «Ertis», «Qaırat», «Tobyl», «Astana» jáne «Qaısar» komandalarynda oıyn kórsetti. 2002-2004 jyldary «Ertis» sapynda ol klýbtyń chempıon bolýyna úlken úlesin qosty. Fýtbolshy mansabyn aıaqtaǵannan keıin ulttyq quramanyń jattyqtyrýshylar shtabyna endi. Keıin Qazaqstan jastar quramasynyń bas bapkeri qyzmetin atqardy.

***

«Atyraý» komandasy bas bapkeri qyzmetine qazaqstandyq Konstantın Gorovenko taǵaıyndaldy.

Qazaqstandyq maman buǵan deıin «Qaırat-Jastar», «Jetisý», «Shahter», «Maqtaaral», «Atyraý» jáne «Kaspıı» komandalary tizginin ustaǵan. Sondaı-aq elimizdiń 21 jasqa deıingi jastar quramasynda basshylyq etti.