Qazaqstanda Apple ókildigi qashan ashylady

ASTANA. QazAqparat – Almatyda Apple ókildigin ashý úshin tıisti jumys júrgizilip jatyr. Bul týraly QR Syrtqy ister mınıstriniń orynbasary Almas Aıdarov aıtty, dep habarlaıdy QazAqparat tilshisi.

«Elshilerimiz alpaýyt kompanııalardyń bas keńsesimen tikeleı sóılesip jatyr. Árbir jeke brendpen biz osy jerde neni qalaıtynymyzǵa qatysty kelissóz júrgizilýde. Eger Apple jaıynda aıtar bolsaq, onda oǵan Qazaqstanda óndiris usyný qısynǵa kelmeıtin sııaqty. Bizde, Qazaqstanda smartfon shyǵarý úshin básekelestik basymdyq joq. Sonymen qatar atalǵan ónimde qoldanylatyn óńdelgen sırek kezdesetin metalldar, arzan jumys kúshi de joq qoı. Sondyqtan naqty Apple-men Almatyda saýda jónindegi resmı ókildigin ashý jóninde kelissóz júrgizilip jatyr. Bizge Apple mundaı deńgeıdegi máselelerdiń sheshilýine shamamen 3-4 jyl ýaqyt ketetinin alǵa tartyp otyr», - dedi ol Ortalyq kommýnıkatsııalar qyzmetindegi baspasóz máslıhatynda BAQ ókilderiniń saýalyna oraı.