22:30, 18 Sáýir 2019 | GMT +6
Qazaqstanda Amazon arqyly eksportty arttyrǵan kompanııa bar - Dáýren Abaev
NUR-SULTAN. QazAqparat - QR Aqparat jáne qoǵamdyq damý mınıstri Dáýren Abaev «Habar» arnasyndaǵy «Ashyq dıalog» baǵdarlamasynda elektrondyq saýda alańy arqyly tabysqa jetken kompanııa jóninde aıtyp berdi, dep habarlaıdy QazAqparat.
«Keshe qazaqstandyq Forbs saıtynan qurǵaq bıe sútin óndiretin Saumal brendi týraly materıal oqydym. Kásiporyn 2015 jyly Qaraǵandynyń shalǵaı aýylynda ashylǵan. Al búginde ónimniń shetelge eksport kólemi 30 tonnany qurady. Ásirese, AQSh, Arab Ámirlikteri, Qytaı men Reseı saýmalǵa erekshe qyzyǵýshylyq tanytyp otyr», - dedi ol.
Mınıstrdiń aıtýynsha, bıe sútin saýýdan sýblımatsııaǵa deıingi óndiristiń barlyq tsıkli avtomattandyrylǵan jáne bul tsıklge taýardy ótkizý protsesin de qosýǵa bolady.
«Óıtkeni, saýmal AQSh-tyń elektrondy Amazon alańynda jaqsy satylyp jatyr. Bul zamanaýı qazaqstandyq kompanııanyń halyqaralyq naryqta jańa tehnologııalardy meńgerip, tıimdi jumys isteı alýynyń keremet úlgisi», - dedi Dáýren Abaev.
