Qazaqstanda alǵash ret qutqarýshylarǵa arnalǵan resort-keshen salynyp jatyr
ASTANA. KAZINFORM — Aqtaý qalasynda Kaspıı teńizi jaǵalaýynda TJM qyzmetkerlerine arnalǵan Qazaqstandaǵy alǵashqy «112 Resort Aktau» resort-kesheniniń qurylysy jalǵasyp jatyr. Bul týraly TJM málim etti.
Joba Qazaqstan Respýblıkasynyń Tótenshe jaǵdaılar mınıstri general-leıtenant Shyńǵys Árinov bastamasymen jáne qazaqstandyq qutqarýshylardyń jeke qorynyń qoldaýymen iske asyrylyp otyr. Qurylysqa arnalǵan jer telimi jergilikti atqarýshy organdar tarapynan berildi.
— Birinshi kezeńde ákimshilik bloktyń, kapsýlalyq úılerdiń, basseınderdiń, sport alańdarynyń jáne serýendeý aımaqtarynyń qurylysy qarastyrylǵan. Aldaǵy ýaqytta keshen aýmaǵynda qonaq úı, SPA-ortalyq, tennıs korty, pırs, vorkaýt-alańy, dámhana jáne otbasylyq demalys aımaqtary salynady, — delingen habarlamada.
Joba qutqarýshylar qyzmetiniń erekshelikteri men jumysynan keıin tolyqqandy qalpyna kelý qajettiligin eskere otyryp ázirlengen.
Baza aýmaǵynda QR TJM jedel-qutqarý jasaǵy men Apattar medıtsınasy ortalyǵy qyzmetkerlerinen quralǵan ámbebap qutqarý bólimshesin ornalastyrý da josparlanýda. Bul turaqty jedel áreket etý daıyndyǵyn qamtamasyz etip, jeke quramnyń daıarlyǵy men qalpyna kelýine qolaıly jaǵdaı jasaýǵa múmkindik beredi.
Mınıstrdiń aıtýynsha qyzmetkerlerge arnalǵan áleýmettik ınfraqurylymdy damytý vedomstvonyń basym baǵyttarynyń biri bolyp qala beredi.
— Biz óz qyzmetkerlerimiz ben olardyń otbasylary úshin laıyqty jaǵdaı jasaýymyz kerek. Qutqarýshylar táýlik boıy qyzmet atqaryp, kúrdeli jaǵdaıda jumys isteıdi. Olardyń tolyqqandy qalpyna kelip, jaqyndarymen ýaqyt ótkizýine múmkindik bolýy tıis, — dep Shyńǵys Árinov atap ótti.
Qurylys aıaqtalǵannan keıin keshen TJM qyzmetkerleri men olardyń otbasy múshelerine qoljetimdi bolady. Qazaqstannyń qutqarýshylary úshin mundaı demalys jáne qalpyna kelý formaty alǵash ret engizilip otyr.
Aıta keteıik, buǵan deıin TJM Kaspııdegi teńiz ınfraqurylymyn damytýdy kúsheıtip jatqanyn jazdyq.
