Qazaqstanda alǵash ret IT-arhıtekter akademııasy quryldy
ASTANA. KAZINFORM — Jasandy ıntellekt jáne tsıfrlyq damý mınıstrligine qarasty Tsıfrlyq úkimetti qoldaý ortalyǵy IT-arhıtektorlar akademııasynyń ashylǵanyn jarııalady.
Bul jańa bilim berý bastamasy memlekettik jáne korporatıvtik deńgeıdegi tsıfrlyq sheshimderdiń arhıtektýralyq sapasyn arttyrýǵa baǵyttalǵan.
Jedel tsıfrlandyrý men jasandy ıntellektti keńinen engizý jaǵdaıynda negizgi kúrdeli máselelerdiń biri — IT-júıelerdiń bytyrańqylyǵy men olardyń qaıtalanýy bolyp qalyp otyr. Qazirgi tańda memlekettik tsıfrlyq servısterdiń yńǵaıly, ózara yqpaldasqan jáne aýqymdalatyn bolýy asa mańyzdy. Mundaı sheshimder daıyn modýlderdi qaıta paıdalaný, tehnologııalyq úılesimdilik jáne biryńǵaı arhıtektýra qaǵıdattaryna súıenýi tıis.
IT-arhıtektorlar akademııasy mamandardy IT júıelerin ıdeıadan bastap iske qosý men jasandy ıntellektini ıntegratsııalaýǵa deıin tutas ekojúıe retinde qarastyrýǵa úıretetin tájirıbege baǵyttalǵan platforma bolmaq.
Oqý baǵdarlamasy tórt negizgi modýlden turady:
- Bıznes-protsesterdi qaıta qurý (reınjınırıng);
- IT-arhıtektýrany jobalaý;
- Jasandy ıntellekt: nólden prototıpke deıin;
- Jobalyq basqarý tásilderi arqyly jobalardy tıimdi iske asyrý jáne bıznes-nátıjelerge qol jetkizý.
Baǵdarlama 2025 jylǵy jeltoqsanda bastalady. Alǵashqy top tyńdaýshylary úshin oqý aqysyz. Ótinimder 2025 jylǵy 20 qarasha men 15 jeltoqsan aralyǵynda govtec.kz saıtynda qabyldanady.
— IT-arhıtektorlar akademııasynyń qurylýy — tsıfrlyq sheshimderdiń sapasyn arttyrýǵa jasalǵan mańyzdy ınvestıtsııa. Biz azamattardyń qajettilikterine negizdelgen, biryńǵaı arhıtektýra talaptaryna saı keletin servısterdi jobalaı alatyn jańa býyn mamandaryn daıarlaımyz. Búginde tsıfrlyq transformatsııa tek tehnologııalarmen emes, júıeli oılaý men klıentke baǵdarlanǵan mádenıetpen ólshenedi, — dedi Tsıfrlyq úkimetti qoldaý ortalyǵynyń bas dırektory Bahtııar Muhametqalıev.
2025 jyldyń tamyz aıynda Tsıfrlyq úkimetti qoldaý ortasynyń bastamasymen barlyq ortalyq memlekettik organdardy, jergilikti atqarýshy organdardy, sondaı-aq «Samuryq-Qazyna» jáne «Báıterek» sııaqty kvazımemlekettik sektor uıymdaryn qamtıtyn Arhıtektýralyq keńes quryldy.
Budan buryn Qazaqstanda Úndistannyń sot saraptamasy jáne IT-krımınalıstıka ýnıversıtetiniń fılıaly ashylatynyn jazǵanbyz.