Qazaqstanda alǵash ret halyqaralyq «IBO-2024» olımpıadasy ótedi
ASTANA. KAZINFORM - Bıologııa páninen álemdegi eń bedeldi halyqaralyq olımpıada bıyl alǵash ret Qazaqstanda ótedi.
Úkimette «IBO-2024» atty bilim dodasyn uıymdastyrý máseleleri pysyqtaldy. QR Premer-Mınıstriniń orynbasary Tamara Dúısenovanyń tóraǵalyǵymen ótken keńeske ortalyq jáne jergilikti memlekettik organdardyń ókilderi qatysty.
«Internetional biology olympiad» álemdegi top-7 pándik jarystardyń qataryna kiredi. Qazaqstandyq oqýshylar bul saıysqa 28 jyl boıy turaqty qatysyp keledi. Osy ýaqyt ishinde olar 70-ten astam túrli nagradalarǵa ıe boldy: 2 altyn, 20 kúmis, 54 qola medal. Osyndaı jetistikterdi eskergen halyqaralyq uıymdastyrý komıteti olımpıadany Astanada ótkizýdi uıǵardy.
Oqý-aǵartý vıtse-mınıstri Edil Ospannyń aıtýynsha, bıylǵy dodada el namysyn 4 daryndy oqýshymyz qorǵaıtyn bolady.
«Elordada ótetin halyqaralyq olımpıadaǵa 81 elden 305 oqýshy men olardyń 275 jetekshisi kelmek. Jarys talaptaryna saı, uıymdastyrý jáne ǵylymı komıtetter qurylyp, arnaıy www.ibo2024.kz saıty ázirlengen. Demeýshiler esebinen teorııalyq jáne tájirıbelik kezeńderge qajetti qurylǵylar satyp alyndy. Olımpıada kezinde 80-nen asa volonter qoldaý kórsetpek»,— dedi Edil Ospan.
Negizgi zııatkerlik týrnırden bólek, qatysýshylar úshin elorda men Aqmola oblysynyń kórikti jerleri boıynsha týr qarastyrylǵan. Sondaı-aq Qazaqstannyń tarıhymen jáne ulttyq ónerimen tanysý boıynsha is-sharalar uıymdastyrylady.
Tamara Dúısenova halyqaralyq olımpıadanyń mańyzdylyǵyna toqtalyp ótip, ony uıymdastyrýǵa jaýapty memlekettik organdarǵa tapsyrmalar júktedi.
«Olımpıadany Qazaqstanda ótkizý oqýshylarymyzdyń bilim deńgeıi joǵary ekenin kórsetedi. Saıys belgilengen talapqa saı ótýi úshin barlyq jaǵdaı jasalýy tıis. Basqa elderden kelgen oqýshylardy qabyldaı otyryp, biz úlken jaýapkershilikti óz moınymyzǵa alamyz. Bilim dodasyna qatysatyn balalardyń ornalasqan jerindegi, olımpıada ótetin oryndaǵy sanıtarlyq talaptardyń saqtalýyna, tasymaldaý kezindegi jol qaýipsizdigin qamtamasyz etýge erekshe nazar aýdarýdy tapsyramyn», — dedi Tamara Dúısenova.
