Qazaqstanda áleýmettik qamtamasyz etý júıesi ózgertilmek

ASTANA. QazAqparat - Qazaqstanda bıznestiń, úkimettik emes uıymdardyń jáne azamattardyń qatysýy esebinen áleýmettik qyzmet kórsetýdi jańǵyrtý josparlanyp otyr. 

 Bul týraly Májiliste «Qazaqstan Respýblıkasynyń keıbir zańnamalyq aktilerine áleýmettik qamsyzdandyrý máseleleri boıynsha ózgerister men tolyqtyrýlar engizý týraly» zań jobasyn tanystyrý barysynda QR Eńbek jáne halyqty áleýmettik qorǵaý vıtse-mınıstri Nurjan Áltaev málim etti, dep habarlaıdy QazAqparat.

«Qujat áleýmettik qyzmet kórsetýge memlekettik organdar men uıymdardyń, sonymen qatar jeke sektordyń, ÚEU, el turǵyndarynyń birdeı qatysýyn qamtamasyz etý jolymen áleýmettik qyzmet kórsetýdi jańǵyrtýdy qarastyrady», - dep toqtaldy N. Áltaev.

Belgili bolǵandaı, zań jobasynda «Mindetti áleýmettik saqtandyrý týraly» jáne «Qazaqstan Respýblıkasynda zeınetaqymen qamsyzdandyrý týraly» Zańyna mindetti áleýmettik saqtandyrý júıesine qatysatyn adamdar sanattaryn naqtylaý, sondaı-aq Áleýmettik saqtandyrý qoryna aýdarymdardy tóleý tártibin ári mólsherlerin naqtylaý jáne basqa da túzetýler kózdelgen.

Bólek túzetýlermen mindetti áleýmettik saqtandyrýdyń negizgi ınstıtýttarynyń qyzmetteri belgilenedi, osy oraıda «Azamattarǵa arnalǵan úkimet» memlekettik korporatsııasynynyń quqyǵy men mindetterin keńeıtý usynylǵan.

Munymen qosa, «Qaıyrymdylyq týraly» Zańyna týǵan jerdi qoldaý úshin qaıyrymdylyq jasaý  tártibin retteıtin túzetýler engizý jolymen Memleket basshysynyń «Bolashaqqa baǵdar: rýhanı jańǵyrý» baǵdarlamalyq maqalasyn iske asyrý eskerilgen.

Sonymen qatar aýylda jumys isteıtin áleýmettik sala mamandary úshin otyn satyp alýǵa ári kommýnaldyq qyzmetterdi tóleýge qoldaý jasaý týraly birqatar zańnamada normalardy úılestirý sharalary usynylady.

 Budan bólek, arnaýly memlekettik organdar qyzmetkerlerin áleýmettik qorǵaý sharalaryn kúsheıtý josparlanǵan. «Syrtqy barlaý týraly» jáne «QR Arnaýly memlekettik organdary týraly» Zańdaryna syrtqy barlaý qyzmeti qyzmetkerleriniń jeńildikpen esepteýge jatatyn qyzmeti kezeńin, sondaı-aq arnaýly memlekettik organdar qyzmetkerleri qataryndaǵy zeınetkerlerdi jerleýge arnalǵan birjolǵy tólemniń mólsherlerin naqtylaıtyn ózgerister men tolyqtyrýlar engizilýde.

Jalpy, zań jobasymen 16 zańnamalyq aktige, onyń ishinde Qazaqstan Respýblıkasynyń 3 kodeksine túzetýler engizý josparlanǵan.

«Zań jobasyn iske asyrýǵa qajetti shyǵystar 2018-2020 jyldarǵa arnalǵan respýblıkalyq bıýdjette mynadaı somada kózdelgen: 2018 jylǵa - 32 mlrd teńge; 2019 jylǵa - 30,8 mlrd teńge; 2020 jylǵa - 29,6 mlrd teńge. Zań jobasyn qabyldaý áleýmettik-ekonomıkalyq ári quqyqtyq teris saldarǵa alyp kelmeıdi», - dedi vıtse-mınıstr.