Qazaqstanda AES salý jumystary qalaı júrip jatyr

NUR-SULTAN. QazAqparat – Qazaqstanda atom elektr stantsııasyn salý jobasy tehnologııalardy zertteý satysynda tur. Bul týraly QR Energetıka vıtse-mınıstri Jandos Nurmaǵanbetov aıtty, dep habarlaıdy QazAqparat tilshisi.

«Biz qazir tehnologııany zertteý satysynda turmyz. Bul jumysty «Qazaqstandyq atom elektr stantsııalary» kompanııasy júrgizip jatyr, kelissózder jasalyp, tájirıbe zerttelýde», - dedi J. Nurmaǵanbetov elordada TMD Elektr energetıkalyq keńesiniń 60-shy otyrysynda tilshilerge bergen suhbatynda.

Onyń aıtýynsha, Qazaqstan ókilderi Ońtústik Koreıaǵa baryp keldi. Koreı tarapy qurylys bóligi boıynsha jobaǵa enýdi jáne kez kelgen reaktor jetkizýshisimen birlesip jumys isteý usynysyn bildirgen.

«ıAǵnı konsortsıým qurý. Týrbınalar amerıkalyq, qurylys qazaqstandyq-koreıalyq jáne basqalaı bolýy múmkin. Osy tásilderdiń barlyǵy qazir pysyqtalyp jatyr», - dep túsindirdi vıtse-mınıstr.

J. Nurmaǵanbetov jobany júzege asyrý tártibi halyqaralyq normalarmen retteletinin aıtty. Tehnologııalardy tańdaý boıynsha sheshim jaqyn arada jarııalanady. Jobanyń barlyq materıaldary 2022 jyldyń ekinshi jartyjyldyǵynda vedomstvoaralyq komıssııanyń, Úkimettiń qaraýyna shyǵarylady.

Buǵan deıin spıker 2035 jylǵa qaraı Qazaqstan energetıkasyna 24,5 gıgavatt qajettilik bolatynyn aıtqan edi.