Qazaqstanda 8 jańa elektr stantsııasy salynady
ASTANA. KAZINFORM – Kómir generatsııasyn damytýdyń 2026–2030 jyldarǵa arnalǵan bekitilgen Ulttyq jobasy elektr energııasyna ósip kele jatqan suranysty strategııalyq turǵydan óteýge, elimizdiń energetıkalyq ınfraqurylymyn tereń jańǵyrtýǵa jáne Birtutas elektr energetıkalyq júıesiniń turaqtylyǵyn qamtamasyz etýge baǵyttalǵan. Negizgi basymdyq bazalyq energııa kózderiniń qurylysyna beriledi.
Energetıka mınıstrligi málimetinshe, 2030 jylǵa deıin 7,8 GVt jańa jáne jańartylǵan qýattardy iske qosý josparlanyp otyr. Onyń ishinde 8 jańa elektr stantsııasyn salý jáne jumys istep turǵan 11 stantsııany jańǵyrtý kózdelgen.
Jalpy qýaty 5,3 GVt bolatyn jańa qurylys baǵdarlamasy elimizdiń mańyzdy toraptaryn qamtıdy. Oǵan Kýrchatovtaǵy kondensatsııalyq elektr stantsııasy (700 MVt), qýatty Ekibastuz GRES-3 (2 640 MVt), Qaraǵandydaǵy (350 MVt) jáne Ekibastuzdaǵy (180 MVt) JES, sondaı-aq Jezqazǵan (500 MVt), Kókshetaý (240 MVt), Semeı (360 MVt) jáne Óskemen (360 MVt) qalalaryndaǵy jańa JEO qurylysy kiredi.
Joba tek generatsııany arttyrýdy ǵana emes, sonymen qatar jumys istep turǵan stantsııalardyń tıimdiligin kóterýdi de maqsat etedi. Jańǵyrtý nátıjesinde jabdyqtardyń tozý deńgeıin 13%-ǵa tómendetý josparlanyp otyr.
Ulttyq jobany iske asyrý odan arǵy ónerkásiptik ósý, tsıfrlyq ekonomıkany damytý jáne jasandy ıntellekt tehnologııalaryn endirý úshin senimdi energetıkalyq negiz jasaýǵa múmkindik beredi.
Kómir generatsııasy tehnologııalyq jańǵyrtý jáne ekologııalyq standarttardy saqtaý shartymen elimizdiń energetıkalyq qaýipsizdigin jáne uzaq merzimdi perspektıvada energııa júıesiniń turaqtylyǵyn qamtamasyz etýde sheshýshi rólin saqtap qalady.
Aıta keteıik, Qazaqstanda elektr qýatyn óndirý men tutyný arasyndaǵy alshaqtyq qysqaryp keledi. Bul jóninde QR Energetıka mınıstrligi resmı saýalymyzǵa joldaǵan jaýabynda málimdedi.
Qazaqstanda elektr energııasyn óndiretin qurylǵylardyń jartysynan astamy ábden eskirgen. Olqylyqty joıý úshin 2035 jylǵa deıin naqty jospar daıyndalǵan.