Qazaqstanda 60-tan astam túrmede úzdiksiz beınebaqylaý júrgiziledi
Qylmystyq-atqarý júıesi komıtetiniń baspasóz hatshysy Roman Telenkovtyń aıtýynsha, QAJ komıteti penıtentsıarlyq mekemelerde úzdiksiz beınebaqylaý engizý jumysyn júrgizip jatyr.
Onyń aıtýynsha, bıyl 78 mekemeniń 62-si úzdiksiz beınebaqylaýmen qamtylǵan.
«Búgingi tańda 28 myńnan astam beınekamera ornatyldy, bul «beınebaqylaýsyz oryndardy» tolyǵymen joıady. Qalǵan 16 mekeme boıynsha beınemonıtorıng engizýdi 2023 jyldyń sońyna deıin aıaqtaý josparlanǵan. Beınebaqylaý adamnyń jeke basyn nemese kóligin anyqtap qana qoımaı, jasalǵan quqyqbuzýshylyqty anyqtaýǵa múmkindik beretin jasandy ıntellekt júıesine ıe», - dedi Roman Telenkov QR ІІM onlaın brıfınginde.
Sonymen birge, QAJ komıtetinde barlyq bólimshelerdiń beınebaqylaý júıeleri taratylatyn ahýal ortalyǵy qurylǵan.
Bul mekemeniń qyzmetine baqylaýdy júzege asyrý men buzýshylyqtar týraly málimetti óńirlik deńgeıde ǵana emes, komıtet deńgeıinde de alýǵa múmkindik beredi.
Búgingi tańda olardyń bir bóligi ortalyqqa qosylǵan.
«Sonymen qatar, qadaǵalaýshy prokýrorlar úshin beıne-sýretterdi qashyqtan qaraý múmkindigi qamtamasyz etiledi. Ahýal ortalyǵyna uıaly baılanysty óshirgishterdiń jáne adam men júk tekserý qondyrǵylarynyń belsendiligin monıtorıngteý júıesi qosylady. Jalpy, jappaı beınebaqylaýdy engizý penıtentsıarlyq mekemelerde quqyqtyq tártipti saqtaýdy jáne tótenshe jaǵdaılar men qylmystarǵa jol bermeýdi qamtamasyz etýge baǵyttalǵan», - deıdi QAJ komıtetiniń baspasóz hatshysy.
