Qazaqstanda 5G jıiligine ashyq aýktsıon bastaldy
Báseke qalyptastyrý maqsatynda aýktsıonǵa radıojıilikterdi bólý tártibimen bekitilgen talaptarǵa saı keletin kompanııalar qatysa alady. Bul aýktsıon 5G tehnologııalary úshin radıojıilik taratýdyń ashyq mehanızmin kórsetedi.
«Búgingi tańda tehnologııalar qarqyndy damyp keledi. Sondyqtan túrli ekojúıelerdi, qosymshalardy, qyzmetterdi júıelendirý úshin sapaly ınfraqurylym qalyptastyrýymyz qajet. Árıne 5G tehnologııasyn damytý úshin birneshe jyldar qajet. Alaıda, osy ýaqyt ishinde trafıkter edáýir úlken kólemde damyp, jańa qyzmetter paıda bolady. Búgin biz azamattarymyzǵa sapaly zamanaýı servısterdi usyný úshin, jańa uıaly baılanys júıesin engizýdi kózdep otyrmyz», - deıdi QR Tsıfrlyq damý vıtse-mınıstri Ashat Orazbek.
Aýktsıon sharttary boıynsha qatysýshyda – keminde alty oblysty, respýblıkalyq mańyzy bar qalalardy qamtıtyn telekommýnıkalııalar men uıaly baılanystyń magıstraldyq jelileri jáne memlekettik lıtsenzııasy bolýy tıis. Sondaı-aq, negizgi sharttarǵa sáıkes, qatysýshy kompanııa taratý nemese bankrotqa ushyraý satysynda bolmaýy kerek. Oǵan qosa, kepildik jarnany tólegeni týraly qujattardy usynýy qajet.
GSMA Intelligence halyqaralyq uıymynyń jahandyq jáne óńirlik zertteýi 2030 jylǵa qaraı 5G tehnologııalary jalpy ishki ónimge jáne áleýmettik-ekonomıkalyq jaǵdaıǵa oń áserin tıgizetinin baǵalaǵan.
Sonymen qatar, halyqaralyq taldaý negizinde 5G tehnologııasyn engizý 2030 jyly álemdik JІÓ-niń 610 mıllıard dollardan asýyna ákeledi. Bul 5G tehnologııasynyń jalpy áleýmettik-ekonomıkalyq áseriniń 65% quraıdy.
5G tehnologııalary men qyzmetteriniń áleýmettik-ekonomıkalyq áserinen bólek, densaýlyq saqtaý men bilimge qoljetimdilikti jaqsartý, qoǵamdyq qaýipsizdikti arttyrý jáne qorshaǵan ortanyń lastanýyn azaıtý sııaqty qosymsha artyqshylyqtary kútilýde.
Joǵaryda atalǵan zertteý boıynsha TMD elderinde 5G-di qoldanysqa engizý arqyly JІÓ-niń 14 mıllıard dollarǵa ósýi boljanyp otyr, onyń ishinde Qazaqstannyń úlesi 12%-dy quraıdy.
Sonymen qatar, kóptegen damyǵan elderde 5G jıilikterin satý aýktsıondarynda qomaqty qarajat bólingenin atap ótken jón. Mysaly, Shveıtsarııada - $378 mln, Italııada - €6,5 mlrd, Ispanııada - €437,6 mln, Avstrııada - €188 mln, Ulybrıtanııada – £1,35 mlrd, Germanııada - €6.5 mlrd, Ońtústik Koreıada- $3,3 mlrd.
Foto:gov.kz
