Qazaqstanda 50 myńǵa jýyq moped tirkeldi

ASTANA. KAZINFORM — Bıyl shilde aıynda 1 myńnan astam moped aıyp turaǵyna qoıyldy. Bul týraly QR Іshki ister mınıstrligi málim etti. 

— Qazirgi kezde elimizde búginde tıisti zańǵa sáıkes tirkelgen mopedter sany 48 139-ǵa jetti, — delingen mınıstrliktiń Kazinform agenttigine bergen jaýabynda.

Іshki ister mınıstrligi moped júrgizýshileriniń jol júrý erejelerin saqtaý boıynsha tıisti sharalardy atqaryp jatyr. Bıylǵy 19-21 shilde aralyǵynda elimizdiń aýmaǵynda moped kólik quraldaryn basqarý tártibine qatysty jedel profılaktıkalyq is sharalar ótkizildi.

— Osy is-sharany ótkizý kezinde moped júrgizýshileri arasynan 3 myńnan astam quqyq buzý deregi anyqtaldy, sondaı-aq 1 myńnan astam moped arnaıy turaqqa qoıyldy. Atalǵan jedel profılaktıkalyq is-sharalar óńirlerdegi polıtsııa departamentteri tarapynan da turaqty negizde ótkiziledi, — dep atalyp ótken vedomstvo aqparatynda.

Eske salsaq, bıyl el aýmaǵynda 5 sáýirge deıin mopedterdi resmı tirkeý mindeti qoıyldy. 5 sáýirden jol erejesin buzǵan moped júrgizýshilerine jaza qatańdatylatynyn jazǵan edik. 

Sáýir aıynyń orta kezinde elimizde 30 myńǵa jýyq moped tirkelgeni málim boldy.

Mopedterdi tirkeý úshin turǵylyqty jeri boıynsha mamandandyrylǵan halyqqa qyzmet kórsetý ortalyǵyna barý qajet. Jeke basyn kýálandyratyn qujat, elektrondy túrde de bolady, mopedtiń tehnıkalyq qujatyn nemese tehnıkalyq sıpattamalary týraly málimetti usyný qajet.