Qazaqstanda 4,7 mıllıonnan asa áıel bala týýǵa qaýqarly

ASTANA. KAZINFORM – Elimizde bala týý jasyndaǵy áıelder sany 4,7 mln asady. Bul týraly OKQ alańynda ótken baspasóz konferentsııasynda Áıelder isteri jáne otbasylyq-demografııalyq saıasat jónindegi ulttyq komıssııa tóraǵasynyń orynbasary, Parlamentarızm Instıtýty dırektorynyń orynbasary Lázzat Súleımen málim etti. 

Onyń aıtýynsha, jasóspirim qyzdar men áıelderdiń reprodýktıvti densaýlyǵyn saqtaý máselesi Prezıdent janyndaǵy Áıelder isteri jáne otbasylyq-demografııalyq saıasat jónindegi Ulttyq komıssııanyń nazarynda.

Memleket tarapynan halyqtyń densaýlyǵyn saqtaý salasyna qomaqty qarjylandyrý, materıaldyq jabdyqtaý boıynsha únemi qoldaý kórsetilip keledi. Sonymen qatar ana men balanyń quqyǵyn qorǵaý, áleýmettik jáne densaýlyq jaǵdaıyn jasaý týraly túrli qorlar, keńester men qoǵamdyq uıymdar jumys isteıdi.

«Jalpy elimizde 0-18 jas aralyǵyndaǵy balalar sany 7 mln-ǵa jýyq, onyń ishinde uldar 51% asady, qyzdar 48-49% shamasynda. Qala/aýyl bólinisinde balalar arasyndaǵy uldar men qyzdardyń da úlesi birdeı. Bala týý jasyndaǵy áıelder sany elimizde 4,7 mln asady», - dedi QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa tóraǵasynyń orynbasary, Parlamentarızm Instıtýty dırektorynyń orynbasary Lázzat Súleımen.