Qazaqstanda 3559 naýqas aǵzasyn aýystyrý úshin kezekte tur

AQTAÝ. QazAqparat - Onyń ishinde Mańǵystaýda 120 naýqas kezegin kútip júr. Onyń ishinde basym bóligi 110 (4 bala) naýqas búıregin aýystyrýy tıis. Al baýyrǵa – 2, júrekke – 2 patsıent muqtaj, dep habarlaıdy QazAqparat.

Bul týraly oblystyq qoǵamdyq kommýnıkatsııa ortalyǵynda ótken brıfıngte respýblıkalyq transplantalogııa ortalyǵynyń Mańǵystaý oblysy boıynsha úılestirýshisi, anestezıolog-reanımatolog Indıra Amanqosqyzy habarlady.

Spıkerdiń aıtýynsha, jyl basynan beri kútý kezegindegi 2 adam (búırek) qaıtys bolǵan.

Jalpy, Qazaqstan boıynsha yqtımal retsıpıentter tirkeliminde (kútý kezegi) 3599 patsıent tur. Onyń ishinde búırek transplantatsııasyna – 3254 (74 - bala), baýyrǵa – 172 adam (9 - bala), júrekke – 153 patsıent (5 - bala).

2012 jyldan bastap qazirgi ýaqytqa deıin Qazaqstanda 2000-nan astam transplantatsııa jasaldy.

Onyń ishinde árbir besinshi transplantatsııa - qaıtys bolǵannan keıingi donordan.

Qazaqstanda týystar arasynda aǵza aýystyrý úlesi búkil transplantatsııalardyń 80,2%-yn quraıdy.

Al Eýropa elderinde aǵzalardy qaıtys bolǵannan keıingi donorlardan transplanttaý basym.

« Mańǵystaý oblysynda donorlyq statsıonar - oblystyq aýrýhana. 2022 jyldyń birinshi toqsanynyń qorytyndysy boıynsha aýrýhanada 29 ólim jaǵdaıy tirkeldi. Onyń ishinde yqtımal donor bolýy múmkin 18-62 jas aralyǵyndaǵy 11 (37,9%) jaǵdaı bar « , - dedi respýblıkalyq transplantalogııa ortalyǵynyń Mańǵystaý oblysy boıynsha úılestirýshisi, anestezıolog-reanımatolog Indıra Amanqosqyzy.

2022 jyldyń birinshi toqsanynda elimizde 44 transplantatsııa júrgizilgen.

Onyń ishinde tiri donordan 37 (84%) operatsııa jáne qaıtys bolǵannan keıin donordan 7 (16%) operatsııa jasaldy.

Mańǵystaý oblysynda jyl basynan beri tiri donordan eki transplantatsııa jasaldy.

Bul rette Qazaqstanda transplantologııa damýynyń barlyq kezeńinde Mańǵystaý oblysynda qaıtys bolǵannan keıingi yqtımal donordy ózektendirýdiń bir de bir jaǵdaıy tirkelgen joq.