Elde 232 jańa mektep salynyp jatyr, bilim sapasy artyp keledi

ASTANA. KAZINFORM – Memleket basshysy Qasym-Jomart Toqaevtyń «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Joldaýynda aıtylǵan tapsyrmalardy iske asyrý aıasynda Úkimet orta bilim júıesin jańǵyrtý boıynsha keshendi jumys júrgizip jatyr. Negizgi mindet – árbir bala úshin bilimniń qoljetimdiligin jáne sapasyn qamtamasyz etý.

Oqýshy oryndarynyń tapshylyǵy men úsh aýysymdy oqytý máselesin sheshý maqsatynda 232 jańa mekteptiń qurylysy júrip jatyr. Olar 2025 jyly paıdalanýǵa berilmek.

- Infraqurylymdy damytýmen qatar, bilim berýdiń mazmunyn jetildirýge de erekshe kóńil bólinýde. Fýnktsıonaldyq saýattylyqty arttyrýǵa baǵyttalǵan júıeli sharalardyń nátıjesinde Qazaqstan bedeldi halyqaralyq PISA reıtınginde úzdik 50 eldiń qataryna kirdi, - delingen Úkimettiń dereginde.

Qazaqstandyq oqýshylardyń joǵary deńgeıdegi daıarlyǵy halyqaralyq olımpıadalardaǵy kórsetkishterinen de baıqalady. Jasóspirimder sońǵy jyldary 1 myńnan astam medal jeńip aldy.

Barshaǵa teń múmkindik berý maqsatynda búginde mektepterdiń 90 paıyzynda ınklıýzıvti bilim berýge jaǵdaı jasalǵan. Sonymen qatar barlyq mektep oqýlyqtary 100 paıyz elektrondy formatqa kóshirildi. Bul oqý materıaldarynyń eldiń kez kelgen óńirinde qoljetimdi bolýyna jol ashty.

Aıta keteıik, úsh aýysymdy mektepterdiń sany tórt ese qysqardy.