Qazaqstanda 22 qarashada qandaı joldar jabyldy

ALMATY. KAZINFORM — «QazAvtoJol» ulttyq kompanııasy eldegi joldardyń qazirgi jaǵdaıy týraly málimet usyndy.

Kompanııanyń málimetinshe, 2025 jylǵy 22 qarashada saǵat 00:30–da Pavlodar oblysynda kólik aıryǵy qondyrmasynyń shetki arqalyqtarynyń zaqymdalýyna baılanysty «Astana — Shiderti — Pavlodar — Ýspenka — RF shekarasy» avtojolynda (Qalqaman eldi mekenine kireberis pen Astanaǵa shyǵatyn baǵyt) kóliktiń barlyq túri úshin qozǵalysqa ýaqytsha shekteý engizildi.

Qalqaman eldi mekeninen Astanaǵa qozǵalys Bereke «Qalqaman — Aqsý» kólik aıryǵy arqyly (uzaqtyǵy 6 shaqyrym) jáne Pavlodar qalasynan Qalqaman eldi mekenine qozǵalys «Baıanaýyl» kólik aıryǵy arqyly júzege asyrylady. Qalqaman eldi mekeninen Pavlodarǵa jáne Astanadan Qalqaman eldi mekenine deıin jol ashyq.

Soltústik Qazaqstan oblysyndaǵy jolda jóndeý-qalpyna keltirý jumystary júrgizilýine baılanysty barlyq kólikterdiń qozǵalysy shekteldi. Buǵan deıin tolassyz jaýyn-shashyn jáne aýyr júk kólikteriniń kóp júrýi saldarynan KZ15-08 «Tımırıazevo — Sarykól — oblys shekarasy» avtojolynyń 0-30-shaqyrymynda (Qostanaı oblysy shekarasy — Tımırıazevo aýyly) jol oıylyp ketken.

Sonymen qatar 5 qarashadan bastap tirkemesi bar jáne jartylaı tirkemeli júk kólikteriniń qozǵalysy Osınov asýynda ýaqytsha shekteldi. Shekteý «Óskemen — Altaı — Katonqaraǵaı — Rahman qaınary» avtojolynyń 46-66-shaqyrymyndaǵy (Severnoe aýyly — Serebrıansk qalasy) ýchaskesinde saqtalady. Bul shara taýly jerde jol qaýipsizdigin qamtamasyz etý úshin qabyldanyp, qys aıaqtalǵanǵa deıin kúshinde bolady.

Eske salaıyq, buǵan deıin sınoptıkter 22 qarashada birneshe óńirde qar jaýyp, kóktaıǵaq bolatynyn eskertken edi.