Qazaqstanda 2030 jylǵa deıin 1,6 mıllıon maman qajet bolady – Eńbek mınıstrligi
ASTANA. KAZINFORM – 2030 jylǵa deıin elimizge 1,6 mln maman qajet bolady. Onyń 403 myńy jumysshy mamandar. Bul týraly QR Eńbek jáne halyqty áleýmettik qorǵaý mınıstrligi Kazinform agenttiginiń resmı saýalyna bergen jaýabynda habarlady.
– 2024 jylǵy sáýirde Mınıstrlik 2025-2030 jyldarǵa orta merzimdi kezeńge ekonomıkanyń kadrlarǵa boljamdy qajetiligin qalyptastyrdy. Onyń nátıjelerine sáıkes, aldaǵy 6 jylda kadrlarǵa jıyntyq suranys 1,6 mln adam sanynda baǵalanyp otyr. Onyń ishinde 900 myńǵa jýyq adam kásiptik-tehnıkalyq bilimi bar qyzmetkerlerge keledi, olardyń 400 myńnan astamy – jumysshy mamandyqtar, - deıdi mınıstrlik ókilderi.
Al bıyl Qazaqstanǵa 64 myń jumysshy maman qajet ekeni habarlandy.
– Jumysshy mamandyqtarǵa qajettilik bylaı bólinedi: 2025 jyly – 63,8 myń adam, 2026 jyly – 65,7 myń adam, 2027 jyly – 67,9 myń adam, 2028 jyly – 66,8 myń adam, 2029 jyly – 67,5 myń adam, al 2030 jyly suranys 71,4 myń adamǵa deıin ósedi, - deıdi jaýaptylar.
Jumysshy kadrlar ásirese qurylys, aýyl sharýashylyǵy, óńdeýshi ónerkásip jáne densaýlyq saqtaý salalarynda barynsha suranysqa ıe. Bul salalardaǵy suranystyń 56%-y atalǵan qyzmetkerlerge baǵyttalǵan.
– Qurylysta barynsha joǵary suranysqa kelesi kásipter ıe: sylaqshylar (9 758 adam), qurylys brıgadalarynyń prorabtary (9 477 adam), dánekerleýshiler (7 229 adam). Aýyl sharýashylyǵy salasynda suranys fermerlerge (10 695 adam), traktorshylar (7 141 adam), iri qara mal ósirý jumysshylaryna (4 940 adam) keledi. Óńdeýshi ónerkásipte dánekerleýshiler (3 342 adam), tiginshiler men kıim jóndeýshiler (2 606 adam), ónerkásiptik qural slesarleri (2 367 adam), santehnıkter men qubyr tartýshylar (2 051 adam) qajet. Densaýlyq saqtaýda suranys orta medpersonaldarǵa (24 614 adam), jedel járdem júrgizýshilerine (4 604 adam), feldsherlerge (4 536 adam) keledi, - deıdi QR Eńbek jáne halyqty áleýmettik qorǵaý mınıstrligi.
Aıta keteıik, buǵan deıin oqýshylar men stýdentterge mamandyq tańdaýǵa kómektesetin jańa platformalar iske qosylǵanyn habarlaǵan edik.