Qazaqstanda 2028 jyldan bastap kepildendirilgen zeınetaqy ósedi

NUR-SULTAN. QazAqparat – Eńbek jáne halyqty áleýmettik qorǵaý mınıstri Birjan Nurymbetov qazaqstandyqtardyń kepildendirilgen memlekettik mınımaldy zeınetaqyny arttyrý josparymen bólisti, dep habarlaıdy QazAqparat tilshisi.

«BJZQ-daǵy zeınetaqy jınaǵynyń qazirgi az mólsherin eskere otyryp, Úkimet pen Ulttyq bank zeınetaqy júıesin damytýdyń barlyq sharasyn qabyldap jatyr. Alaıda bul rette memleket tarapynan kepildendirilgen bir bólik bolýy tıis. Osy sebepti biz Prezıdentke 2028 jyldan bastap memleket jumys ótili men aılyq mólsherine qaramastan beretin kepildendirilgen mınımaldy zeınetaqyny engizý bastamasyn usyndyq. Bul usynys zeınetaqy júıesin jańǵyrtý tujyrymynda jazylǵan», - dedi Birjan Nurymbetov Parlament Senatynda ótken dóńgelek ústel barysynda.

Qazirgi tańda aılyq aýdarym men jumys ótiline qaramastan bazalyq zeınetaqy tólemin barlyq zeınetker alady. 2020 jyly onyń mólsheri kúnkóris mınımýmynyń 54 paıyzyn, ıaǵnı 16,8 myń teńgeni quraǵan.

«2028 jyldan bastap bes jyldan az ýaqyt jumys ótili barlarǵa kúnkóris mınımýmynyń 70 paıyzyna teń bazalyq zeınetaqy berýdi josparlap otyrmyz. Al ol tusta kúnkóris mınımýmy qazirgiden qaraǵanda 1,5 ese kóp bolýy tıis», - dedi ol.

Eske sala ketsek, buǵan deıin Úkimet azamattardyń zeınetaqy jınaǵyn paıdalaný múmkindigi boıynsha Prezıdentke usynys bergenin habarlaǵan edik.