Qazaqstanda 2022 jyly qandaı jańa zaýyttar men fabrıkalar ashyldy
Úkimettiń málimetinshe, jyl saıyn osyndaı qoldaýǵa muqtaj ondaǵan myń kásipker memlekettiń kómegine júginedi: bireýlerge sýbsıdııalaý nemese nesıeler boıynsha kepildik alý kerek bolsa, endi birine – ınnovatsııalyq ıdeıalaryn iske asyrý úshin grant, keı kásipkerlerge – tıisti ınfraqurylymdy júrgizý jáne konsýltatsııalyq qyzmetter alý qajet.
Álbette, osyndaı birlesken jumystardyń nátıjesinde el ekonomıkasynyń qýatyn arttyratyn jańa kásiporyndar paıda bolady. Olardyń iske qosylýy básekege qabiletti ekonomıkany damytýǵa, ımporttyń ornyn almastyryp, respýblıkanyń eksporttyq múmkindikterin keńeıtýge múmkindik beredi. Sonymen qatar jańa kásiporyndardyń ashylýy qoǵamnyń ózge de salalaryna, sonyń ishinde eńbek naryǵynda jańa jumys oryndaryn qurýǵa, sol arqyly halyqty jumyspen qamtýǵa mýltıplıkatıvti áser etedi.
2022 jyly maqsatty túrde júrgizilgen memlekettik qoldaý sharalarynyń arqasynda Qazaqstan ekonomıkasynyń túrli sektorlarynda qandaı óndirister iske qosyldy?
Bıyl «Ońtústik» Shymkent ındýstrııalyq aımaǵynda «QazAlPack» JShS alıýmınıı bankalar men sýsyndarǵa arnalǵan qaqpaq túrlerin shyǵaratyn zaýyt ashyldy. Bul – Ortalyq Azııadaǵy osyndaı ónim shyǵaratyn alǵashqy zaýyt. Onyń qýattylyǵy jylyna 750 mln jıyntyq ónimdi quraıdy. Óndiris jelisiniń jyldamdyǵy sekýndyna 50 banka nemese mınýtyna 3000 qaqpaq shyǵarýǵa múmkindigi bar. Joba AQSh-tyń eń ozyq qondyrǵylarymen jabdyqtalǵan.
Aqtóbedegi keramıkalyq granıt pen keramıka taqtaı jáne basqa da qurylys materıaldaryn shyǵaratyn taǵy bir jańa zaýyt («Zerde-Keramıka Aqtóbe» JShS) aýdany 15 ga alańda ornalasqan. Buǵan deıin kompanııa Shymkentte osy tektes kásiporyndy iske qosqan bolatyn. Búgingi tańda memlekettiń qoldaýymen jabdyqtar satyp alynyp, ekinshisi zaýyttyń qurylysy aıaqtaldy.
Kásiporynnyń óndiristik qýaty jylyna 5 mln sharshy metr taqtaı shyǵarýǵa jetedi. Ónimder Eýropalyq sapa standarttaryna sáıkes keledi, ishki naryqqa jetkiziledi jáne Reseı, Tájikstan, Ózbekstan, Qyrǵyzstan elderine eksporttalady. Aldyn ala baǵalaýlar boıynsha, zaýyt ónimderi Qazaqstannyń keramıkalyq taqtaıǵa degen qajettiligin tolyqtaı qamtıdy. Sonymen qatar munda 180-nen astam adam jumysqa ornalasty.
«Grant-ıÝt» JShS Almatyda aıaq kıim óndirisin jolǵa qoıdy.
Kásiporyn bıznesti memlekettik qoldaý tetikteriniń kómegimen jumys istep turǵan fabrıkanyń aýmaǵyn jańǵyrtyp, keńeıtti. Qazirgi ýaqytta kompanııa jyl saıyn tabıǵı shıkizattan 120 myń jupqa deıin sapaly ári jaıly aıaq kıim shyǵarady. Ónim tolyqtaı derlik elimizdiń ishki naryǵyna jiberiledi.
Sondaı-aq 2022 jyl qarsańynda Qostanaı oblysynda «BEEF EXPORT Group» JShS jańa et óńdeý kombınatynyń qurylysy aıaqtaldy. Ol Halal normalary boıynsha jáne halyqaralyq ekostandartqa sáıkes et ónimderin óndirýge baǵyttalǵan. Kásiporyn táýligine 23 900 kg et ónimderin óndiredi, sondaı-aq mamandandyrylǵan júk mashınalarynyń kómegimen ony tutynýshylarǵa (iri saýda jelileri, qoǵamdyq tamaqtandyrý oryndary, bazarlar jáne t.b.) jetkizedi.
Sonymen qatar Shyǵys Qazaqstan oblysynda qýattylyǵy jylyna 200 myń tonnaǵa deıin jetetin «Altyn Shyghys» JShS ósimdik maıyn shyǵaratyn zaýyt ashyldy.
Kásiporyn Bolgarııa, Túrkııa, Germanııa, Nıderland jáne Ýkraına elderinen ákelingen zamanaýı qondyrǵylarymen jabdyqtalǵan, óndiris qaldyqsyz jumys isteıdi jáne tolyqtaı avtomattandyrylatyn bolady.
Zaýyt ónimderi Qytaıǵa, Iranǵa, Ózbekstanǵa jáne basqa elderge eksporttalady dep kútilýde.
Ulytaý oblysynda «Qaztehfıltr» JShS joǵary eýropalyq standarttar boıynsha aýa súzgishteriniń elementterin óndirýdi jolǵa qoıdy. Kompanııa avtomobılder men tońazytqysh qondyrǵylaryna arnalǵan aýa fıltrleriniń túrlerin, sondaı-aq 2TE116 teplovozdaryna arnalǵan maı fıltrlerin shyǵarady.
Bıyl «Qazmunaıhım» JShS «Pavlodar» AEA aýmaǵynda joǵary tehnologııalyq zamanaýı jabdyqtarmen jaraqtandyrylǵan munaı óńdeý men munaı óndirýge arnalǵan qospalar men reagentter shyǵaratyn zaýytty paıdalanýǵa berdi. Sonymen qatar kompanııa sý tazartatyn reagentter shyǵarady.
Bul – Qazaqstandaǵy munaı-hımııa ónimderin jasap shyǵaratyn tolyq tsıkldi alǵashqy óndiris. Onyń qýaty – jylyna 30 myń tonna reagentter men qospalar.
Buryn respýblıkanyń munaı-gaz salasyna arnalǵan hımııalyq reagentterdiń 95%-y shetelden ákelinetin. Alaıda, atalǵan zaýyttyń iske qosylýy Pavlodar oblysyn ǵana emes, sondaı-aq basqa da munaı óńdeý zaýyttary bar óńirlerdi reagenttermen 60%-ǵa qamtamasyz etýge jáne ónimdi TMD, Eýropalyq Odaq, Taıaý Shyǵys jáne AQSh elderine eksporttaýǵa múmkindik beredi dep boljanyp otyr.
2022 jyly Almaty oblysynda broıler etin óndirý jáne qaıta óńdeý boıynsha tolyq tsıkldi qus kesheni ashyldy («Prıma Qus» JShS).
Onyń qýattylyǵy jylyna 35 myń tonna ónimdi quraıdy. Aıta keteıik, Qazaqstan qus ósirýshiler odaǵynyń derekteri boıynsha respýblıkanyń qus etine jyl saıynǵy qajettiligi – shamamen 300 myń tonna.
Jańa jobalar ondyǵyna Almatydaǵy «QUWATT» JShS-niń elektr jabdyqtary men quramdas bólshekterin (dızeldi generatorlar, elektr taratý qalqandary men shkaftar, mańdaıshalar, transformatorlyq qosalqy stantsııalar jáne t.b.) shyǵaratyn kásiporyn jáne Abaı oblysyndaǵy «Qazpolıgraf» JShS býyp-túıý materıaldarynyń keń spektrin shyǵaratyn Qazaqstandaǵy iri óndiris kiredi.
Qorytyndylaı kele, memleket «Damý» kásipkerlikti damytý qory» AQ arqyly sońǵy 25 jylda jalpy somasy 10,3 trln teńgeden asatyn 180 myńnan astam jobaǵa qoldaý kórsetti. Sonymen qatar elimizde qarjylyq, ınfraqurylymdyq jáne konsýltatsııalyq qoldaý sharalarynan bólek, jalpy bıznes júrgizý úshin qolaıly jaǵdaılar jasalýda. Atap aıtqanda, QR Prezıdenti Qasym-Jomart Toqaevtyń tapsyrmasy boıynsha Úkimet negizsiz qoıylatyn talaptar men tekserýlerdiń kúshin joıý, salyq rásimderin jeńildetý, kásipkerlikti odan ári damytý úshin jańa yntalandyrý sharalaryn qabyldaý baǵytynda da memlekettik qoldaý tetikterin jetildirýde.
Foto: primeminister.kz
