Qazaqstanda 18 qarashada qaı joldar jabyq tur

ALMATY. KAZINFORM — «QazAvtoJol» ulttyq kompanııasy eldegi avtojoldardyń qazirgi jaǵdaıy týraly málimet usyndy.

«QazAvtoJol» derekteri boıynsha, 2025 jylǵy 17 qarashada saǵat 18:00–de Aqmola oblysynda aýa raıynyń nasharlaýyna, atap aıtqanda qalyń tumanǵa baılanysty respýblıkalyq mańyzy bar «KAZ02 Astana — Kókshetaý (Obezd arqyly) — Petropavl — RF shekarasy (Jańa Jol beketi)» avtojolynyń 19-231-shaqyrymynda (Astana qalasy — Şýchınsk qalasy baǵyty) barlyq kólik túri úshin jyldamdyq rejımi 140 shaq/saǵattan 110 shaq/saǵatqa deıin tómendetildi.

Sondaı-aq Soltústik Qazaqstan oblysyndaǵy jolda jóndeý-qalpyna keltirý jumystary júrgizilýine baılanysty barlyq kóliktiń qozǵalysy shekteldi. Buǵan deıin tolassyz jaýyn-shashyn jáne aýyr júk kólikteriniń kóp júrýi saldarynan KZ15-08 «Tımırıazevo — Sarykól — oblys shekarasy» avtojolynyń 0-30-shaqyrymynda (Qostanaı oblysy shekarasy — Tımırıazevo aýyly) jol oıylyp ketken.

Sonymen qatar 5 qarashadan bastap tirkemesi bar jáne jartylaı tirkemeli júk kólikteriniń qozǵalysy Osınov asýynda ýaqytsha shekteldi. Shekteý «Óskemen — Altaı — Katonqaraǵaı — Rahman qaınary» avtojolynyń 46-66-shaqyrymyndaǵy (Severnoe aýyly — Serebrıansk qalasy) ýchaskesinde saqtalady.

Bul shara taýly jerde jol qaýipsizdigin qamtamasyz etý maqsatynda qabyldanyp, qys maýsymy aıaqtalǵanǵa deıin kúshinde bolady.

Eske salaıyq, buǵan deıin Qazgıdromet kompanııasy aldaǵy qys mezgiline arnalǵan aýa raıynyń konsýltatıvtik boljamyn usynǵan edi.

Aldyn ala boljam boıynsha respýblıkanyń basym bóliginde qys mezgili qońyrjaı jyly bolady, jaýyn-shashyn mólsheri klımattyq norma shamasynda kútiledi. Alaıda keıbir kezeńde burqasyn, ekpindi jel, kóktaıǵaq qubylystary, tuman, mol jaýyn-shashynnyń túsýi boljanyp otyr.