Qazaqstanda 12 myń bala turmysy nashar otbasynda turyp jatyr
ASTANA. KAZINFORM — Bala quqyqtary jónindegi ýákil Dınara Zákıeva Qazaqstan Respýblıkasyndaǵy turmysy nashar otbasylardaǵy balalardyń sanyn jarııalady
«Aıta ketý kerek, jaǵdaıy nashar otbasylarda 12 myń bala ómir súrip jatyr. Bul rette balalar úıde ata-anasynyń janynda, ıaǵnı olardy ata-ana quqyǵynan eshkim aıyrǵan joq. Bul otbasylar baqylaýda tur, balalary da otbasynda tárbıelenip jatyr», — dedi D. Zákıev tilshiler suraǵyna jaýap bere otyryp.
Onyń aıtýynsha, bul qadamdar balanyń otbasynda ómir súrý múmkindigin barynsha saqtaý úshin jasalyp jatyr.
«Memleketimizdiń maqsaty — otbasyn nyǵaıtý. Sondyqtan balany otbasynan sebepsiz ári negizsiz tartyp alýy múmkin dep aıtý durys emes», — dedi Bala quqyqtary jónindegi ýákil.
Búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine áıelderdiń quqyqtary men balalardyń qaýipsizdigin qamtamasyz etý máseleleri boıynsha ózgerister men tolyqtyrýlar engizý týraly» Zańy men ilespe qujat eki oqylymda qaralyp, maquldandy.
Májilis depýtaty Juldyz Súleımenova jańa zańnamalyq normalarda balalardy ata-analarynan tartyp alý máselesi qarastyrylmaǵanyn málim etti.
