Qazaqstanda 12 qarashada qandaı joldar jabyq
ALMATY. KAZINFORM — «QazAvtoJol» ulttyq kompanııasynyń málimetinshe, 12 qarashada keı óńirde kólik jyldamdyǵyna baılanysty shekteýler engizilse, endi birneshe oblysta buǵan deıin jabylǵan joldar qaıta ashyldy.
2025 jylǵy 12 qarasha saǵat 08:00–de myna respýblıkalyq mańyzy bar avtojoldarda kóliktiń barlyq túri úshin qozǵalys qaıta jandandy:
Aqmola oblysy:
• «Astana-Qaraǵandy-Almaty» avtojolynyń 30-92 shaqyrym aralyǵyndaǵy ýchaskesinde (Jibek Joly aqy alý pýnktinen — Qaraǵandy oblysynyń shekarasyna deıin);
Qaraǵandy oblysy:
• «Astana-Qaraǵandy-Almaty» avtojolynyń 92-164-shaqyrym aralyǵyndaǵy ýchaskesinde (Aqmola oblysynyń shekarasynan — Temirtaý aqy alý pýnktine deıin);
Aqmola oblysynda jyldamdyq rejımine qatysty shekteýler bar:
• 2025 jylǵy 12 qarashada saǵat 08:00–de «KAZ 01 Astana — Qaraǵandy — Almaty» avtojolynyń 30-92-shaqyrymynda (Jibek joly aýyly — Anar stansasy aralyǵy) jyldamdyq shekteýi 60 shaq/saǵ-tan 80 shaq/saǵ-qa deıin ózgertildi (barlyq kólik túrine).
• 7 qarashada saǵat 18:00–den bastap «Astana — Kókshetaý — Petropavl — Reseı shekarasy» avtojolynyń 19-231-shaqyrymynda (Astana — Şýchınsk baǵyty) barlyq kólik túri úshin jyldamdyq shekteýi 110 shaq/saǵ-tan 80 shaq/saǵ-qa deıin azaıtyldy.
Shyǵys Qazaqstan oblysynda 5 qarashadan bastap tirkemesi bar jáne jartylaı tirkemeli júk kólikteriniń qozǵalysy Osınov asýynda ýaqytsha shekteldi. Shekteý «Óskemen — Altaı — Katonqaraǵaı — Rahman qaınary» avtojolynyń 46-66-shaqyrymyndaǵy (Severnoe aýyly — Serebrıansk qalasy) ýchaskesinde saqtalady.
Bul shara taýly jerde jol qaýipsizdigin qamtamasyz etý maqsatynda qabyldanyp, qys aıaqtalǵanǵa deıin kúshinde bolady.
Aýa raıy
2025 jylǵy 12 qarashada Aqmola, Qaraǵandy, Shyǵys Qazaqstan, Jetisý, Abaı jáne Pavlodar oblystarynda qar aralas jańbyr men qar jaýady.
— Sol sebepti júrgizýshilerge jyldamdyq rejımi men qaýipsiz araqashyqtyqty qatań saqtap, joldardaǵy aýa raıynyń qolaısyzdyǵyn eskerýlerińizdi suraımyz, — delingen habarlamada.
Eske salaıyq, buǵan deıin 12 qarasha kúni Astana qalasynda jáne elimizdiń 15 óńirinde aýa raıynyń nasharlaýyna baılanysty daýyldy eskertý jarııalanǵanyn habarlaǵanbyz.