Qazaqstanda 11,4 mln tonna bıdaı jınaldy

QR Aýyl sharýashylyǵy mınıstri Aıdarbek Saparov bıylǵy egin naýqanyn qorytyndylap, qandaı daqyldar men kókónister jınalǵanyn aıtyp berdi, dep habarlaıdy Kazinform.

"Búgingi tańda elimizdiń barlyq óńirlerinde astyq jınaý aıaqtalý satysynda. Oblys ákimdikteriniń derekteri boıynsha ortasha ónimdiligi 9,7 ts/ga bastapqy salmaqta 16,4 mln tonna astyq bastyryldy, onyń 11,4 mln tonnasy bıdaı", - dedi A. Saparov Úkimet otyrysynda.

Daqyldar bólinisinde bıdaı jınalatyn alań 13,4 mln gektardy quraıdy, onyń 11,4 mln tonnasy bastyryldy.

Maıly daqyldar 1,9 mln gektar nemese 68%-dy kórsetken, qazirgi ýaqytta 1,6 mln tonna maı tuqymy jınaldy. Onyń ishinde kúnbaǵystyń ortasha ónimdiligi 11,6 ts/ga bolyp, 747,5 myń tonnasy bastyrylǵan.

Kartop 168,8 myń ga aýmaqtan tolyǵymen jınalyp, 3,5 mln tonnany quraǵan.

Kókónis daqyldary 162,4 myń ga alańnan jınaldy, jalpy alym 4,3 mln tonnaǵa jetken.

«Aýa raıynyń qolaısyzdyǵyna qaramastan, jalpy jınalatyn astyq – 16 mln tonnany (bıdaı 11,3 mln tonna) quraıdy. 3 mln tonna kólemindegi aýyspaly astyq qaldyqtaryn eskersek, eldi nan, un jáne makaron ónimderimen tolyq qamtamasyz etý úshin jetkilikti. Lıtsenzııalanǵan astyq qabyldaý kásiporyndaryna barlyǵy 4,7 mln tonna astyq quıyldy, onyń ishinde 1,8 mln tonna – 3-suryp astyǵy», - dedi A. Saparov.

Buǵan deıin Aýyl sharýashylyǵy mınıstri bıylǵy jyl fermerler úshin ońaı bolmaǵanyn, negizgi astyq egetin óńirlerde nóser jańbyr 25 kúnnen asqanyn aıtqan edi.