Qazaqstanda 100 myńǵa tarta kásiporynnyń zeınetaqy jarnasy boıynsha qaryzy bar

NUR-SULTAN. QazAqparat – QR Eńbek jáne halyqty áleýmettik qorǵaý mınıstri Birjan Nurymbetov qazaqstandyqtardyń zeınetaqy júıesimen qamtylý deńgeıi týraly baıandap berdi, dep habarlaıdy QazAqparat tilshisi.

«Bizdiń el zeınetaqy jınaǵynyń júıesimen tolyq qamtylmaǵan. Tólemderdiń turaqsyzdyǵy da baıqalady. Jumyspen qamtylǵandardyń jalpy sany – 8,7 mln adam. Osy halyqtyń ishinde jylyna bir ret bolsyn zeınetaqy jınaǵy aýdarylatyndardyń sany – 6,5 mln mln adam», - dedi Birjan Nurymbetov Parlament Senatynda ótken dóńgelek ústel barysynda.

Onyń aıtýyna qaraǵanda, osy atalǵan halyqtyń 1,6 mıllıonyna jylyna 1-den 5 mártege degen zeınetaqy tólemi aýdarylyp otyrady.

«Jalpy, Qazaqstandaǵy 100 myńǵa tarta kásiporynnyń 2,7 mlrd teńge kóleminde mindetti zeınetaqy jarnasy boıynsha qaryzy bar. Sol sebepti, jumys berýshiniń tólem boıynsha jaýapkershiligin arttyrý sharalaryn kúsheıtýdi usynyp otyrmyz. Qazirgi tańda zeınetaqy qaryzy – 2,7 mlrd teńge degenimizben, salyq boıynsha qaryz joq. Osynyń ózi zeınetaqy aýdarymyna degen qarym-qatynastyń qandaı ekenin kórsetedi», - dedi Birjan Nurymbetov.

Eske sala ketsek, buǵan deıin Úkimet azamattardyń zeınetaqy jınaǵyn paıdalaný múmkindigi boıynsha Prezıdentke usynys bergenin habarlaǵan edik.