Nazarbaev Ýnıversıteti alǵash ret álemdik TOP-500 qataryna endi

ASTANA. KAZINFORM — Qazaqstan bedeldi Times Higher Education World University Rankings 2026 álemdik reıtıngine engen ýnıversıtetter sany boıynsha Ortalyq Azııa men Kavkaz elderi arasynda birinshi orynǵa shyqty. Bul týraly Ǵylym jáne joǵary bilim mınıstri Saıasat Nurbek málim etti.

Onyń sózinshe, reıtıngke elimizdiń bes joǵary oqý orny endi, al Nazarbaev Ýnıversıteti alǵash ret álemdik top-500 qataryna kirdi. 

— Nazarbaev Ýnıversıteti 401-500 oryndar aralyǵyna kóterilip, bul — qazaqstandyq ýnıversıtetterdiń atalmysh reıtıngtegi barlyq ýaqyttaǵy eń úzdik nátıjesi boldy. Sondaı-aq ál-Farabı atyndaǵy Qazaq ulttyq ýnıversıteti óz ornyn 1201-1500 dıapazonynda saqtap qaldy. Reıtıngke budan bólek L. N. Gýmılev atyndaǵy Eýrazııa ulttyq ýnıversıteti, Satbayev University jáne Qazaq agrarlyq zertteý ýnıversıteti endi. Jalpy bıyl reıtıngke Ortalyq Azııa men Kavkazdyń bes elinen 17 ýnıversıtet kirdi — bul óńir úshin rekordtyq kórsetkish. Onyń ishinde Qazaqstan — eń kóp oqý orny engen memleket atandy, — dedi mınıstr.

Saıasat Nurbek atap ótkendeı, bul jetistik — Memleket basshysynyń joǵary bilim men ǵylymdy damytýǵa aıryqsha kóńil bólip otyrǵanynyń aıǵaǵy. Sondaı-aq ol elimizdiń joǵary bilim berý júıesiniń sapa men básekege qabilettilikti arttyra otyryp, halyqaralyq deńgeıde tanylýǵa nyq qadam basyp kele jatqanyn kórsetedi.

Buǵan deıin habarlanǵandaı, ekonomıkalyq yntymaqtastyq jáne damý uıymy júrgizgen TALIS-2024 sabaq berý jáne oqytýdyń halyqaralyq zertteýiniń nátıjesi boıynsha, Qazaqstannyń bilim berý júıesinde oń ózgerister baıqaldy.

Al májilismen Ashat Aımaǵambetov halyqaralyq zertteýiniń nátıjesi týraly jazba jarııalady.