Qazaqstan jyl basynan beri 5,6 mlrd dollarǵa taýar eksporttady

ASTANA. KAZINFORM — Otandyq óńdeý ónerkásibiniń damý dınamıkasy týraly Úkimet otyrysynda qaraldy.

«Bıyl 4 aıdyń ishinde óndiris kólemi 7,1 trln teńgeni qurap, 5,6 mlrd dollar bolatyn otandyq taýarlar eksporttaldy. Negizgi kapıtalǵa salynǵan ınvestıtsııalar kólemi ótken jyldyń 4 aıymen salystyrǵanda 19,9% ulǵaıyp, 403,2 mlrd teńgeni qurady. Ónerkásip salasynyń ekonomıkaǵa qosqan úlesi 4,3 trln teńge boldy. 2023 jyldyń qorytyndysy boıynsha eńbek ónimdiligi bir adamǵa shaqqanda 52,7 myń dollarǵa jetti», — dedi Ónerkásip jáne qurylys mınıstri Qanat Sharlapaev Úkimet otyrysynda.

Mınıstrdiń paıymdaýynsha, bıyl 4 aıdyń qorytyndysy boıynsha óńdeý ónerkásibiniń ósimi 105,2%-ǵa jetip otyr.

«Metallýrgııa ónerkásibi boıynsha 1 mln tonna shoıyn, 1,3 mln tonna bolat, 834 myń tonna tegis prokat, 87,4 myń tonna alıýmınıı, 89 myń tonn myrysh jáne 159,8 myń tonnadaı mys óndirildi. Bıyl metallýrgııa salasynda salynatyn ınvestıtsııa kólemin 464,2 mlrd teńgege jetkizip, 4,700 astam jumys ornyn ashatyn 21 jobany iske asyrýdy josparlap otyrmyz. Onyń ishinde Qaraǵandy oblysyndaǵy TEMPO Qazaqstan bolat qubyr óndirý zaýyty jáne Shymkent qalasyndaǵy QazAlPack alıýmınıı qaptamasyn shyǵarý keshenin ulǵaıtpaqpyz», — deıdi vedomstvo basshysy.