Qazaqstan jastarynyń 3,9 paıyzy esirtkiniń dámin tatqan - zertteý

NUR-SULTAN. QazAqparat – Sońǵy 5 jyl ishinde Qazaqstanda esirtkini tutyný deńgeıine qatysty birneshe epıdemıologııalyq zertteý júrgizildi. Bul týraly QR Densaýlyq saqtaý mınıstrliginiń shtattan tys bas psıhıatr-narkology Qýanysh Altynbekov aıtty, dep habarlaıdy QazAqparat tilshisi.

«2019 jyldyń qyrkúıeginde jańa psıhobelsendi zattar – sıntetıkalyq esirtkilerdi tutyný boıynsha narkologııalyq jaǵdaıǵa epıdemıologııalyq baǵalaý júrgizildi. Qazirgi ýaqytta Psıhıkalyq densaýlyq ortalyǵymyz JITS, týberkýlez jáne bezgekpen kúres jónindegi Jahandyq qordyń qoldaýymen elimizde sıntetıkalyq esirtkiniń 18-34 jas aralyǵyndaǵy jastar arasynda taralýyn klınıkalyq-epıdemıologııalyq zertteýdi aıaqtady»,- dedi Qýanysh Altynbekov Ortalyq kommýnıkatsııalar qyzmetinde ótken baspasóz máslıhatynda.

Onyń atap ótýinshe, eki zertteýdiń nátıjeleri taldandy. Ondaǵy málimetterge sáıkes, sıntetıkalyq esirtkini ómirinde qoldanyp kórgen adamdar sany 6,3 paıyzdan 3,9 paıyzǵa deıin azaıdy. Sońǵy 30 kún ishinde sıntetıkalyq esirtkini tutynyp kórgen adamdardyń sany 2,4 paıyzdan 0,6 paıyzǵa deıin tómendedi.

«Halyqaralyq standarttarǵa sáıkes, mundaı zertteýler úsh jylda bir ret júrgiziledi jáne elimizde 2024 jyly «Deni saý ult» ulttyq jobasy aıasynda jastar arasynda kelesi zertteý júrgizý josparlanǵan», - dedi ol.

Foto: images.glavred.info