Qazaqstan Zeınetaqy qorlarynyń halyqaralyq qaýymdastyǵyn basqarýǵa kiristi

ASTANA. QazAqparat - Bıyldan bastap Qazaqstan Respýblıkasy Zeınetaqy jáne áleýmettik qorlarynyń halyqaralyq qaýymdastyǵyna tóraǵalyq etýdi bastady. Bas kezinde atalǵan jańalyq resmı túrde jarııalanbady. Búgin Astanada ótken respýblıkalyq keńeske Áleýmettik qamsyzdandyrý jónindegi halyqaralyq qaýymdastyqtyń Bas xatshysy Hans-Horst Konkolevskıdiń ózi kelip, Qazaqstandy taǵy bir mańyzdy uıymǵa tóraǵalyq etýimen quttyqtady, dep xabarlaıdy QazAqparat tilshisi.

«Bıyl bastap Qazaqstan Zeınetaqy jáne áleýmettik qorlarynyń halyqaralyq qaýymdastyǵyn basqarýǵa kiristi. Bul - bizdiń áriptestik uıymymyz. Oǵan TMD elderindegi áleýmettik saqtandyrý qorlary kiredi. Osy oraıda Qazaqstannyń Eńbek jáne xalyqty áleýmettik qorǵaý mınıstrliginiń áleýmettik qamsyzdandyrý júıesin jetildirý salasyndaǵy eńbegin erekshe atap ótken jón. Sebebi xalyqty áleýmettik qorǵaý júıesi - asa qıyn mexanızm. Ony ýaqyt talabyna qaraı jetildirip otyrǵan durys. Estýimshe, qazirgi kezde Qazaqstan barlyq salalardy jańǵyrtý, tipti qoǵamdyq sanany jańǵyrtý bastamalaryn kóterip jatyr. Osyny men tolyǵymen qoldaımyn», - deıdi H.Konkolevskı.

Onyń aıtýynsha, elimizdiń áleýmettik qamsyzdandyrý salasyndaǵy qazirgi tájirıbesin eskersek, bolashaqta tıimdi júıeni qalyptastyrýǵa ábden bolady.

Aıta keteıik, Áleýmettik qamsyzdandyrý jónindegi  halyqaralyq qaýymdastyqqa álemniń 150 memleketi kiredi. Al zeınetaqy qorlarynyń Halyqaralyq qaýymdastyǵyna TMD-nyń 9 eli múshe. Qazaqstan dál osy uıymǵa tóraǵalyq etedi.