Qazaqstan ıadrolyq otyn jasaýdyń tolyq tsıklin qalyptastyrýdy josparlaýda
«Qazaqstan Respýblıkasy damýynyń strategııalyq josparynda energetıka salasyndaǵy basty maqsattardyń biri - 2020 jylǵa qaraı ıadrolyq otyn tsıklimen vertıkaldy yqpaldasqan kompanııa qurý sanalady. Qazaqstan tabıǵı ýrandy óndirip, satyp qana qoımaı joǵary qosylǵan quny bar ýran ónimderin shyǵaryp, satýǵa da múddelik tanytady», - dedi mınıstr.
Bozymbaevtyń atap ótýinshe, atom ónerkásibi baǵytyndaǵy basymdyqtardyń biri ıadrolyq otyn jasaýdyń tolyq tsıklin qalypastyrý bolyp otyr. Bul rette qazaqstandyq resýrstyq baza barynsha keńinen qoldanylatyn bolady.
«Tańdap alynǵan baǵyttyń basymdyǵy joǵary qosylǵan quny bar ónim jasaý úshin tehnologııalardy damytý, eksporttyq áleýetti arttyrý, jahandyq naryqqa keshendi ónim usyný múmkinshiligi men satýdyń jańa naryqtaryn damytý bolmaq», - dedi ol.
Aıta keteıik, 2016 jyly ýran óndirisiniń kólemi 24 070 tonnany qurap, 2009 jylmen salystyrǵanda 76 paıyzǵa ósim kórsetti.
Al 2017 jyldyń qańtarynda respýblıkada ýran óndirisiniń kólemin 10 paıyzǵa ıaǵnı, 22 myń tonnaǵa deıin tómendetý týraly sheshimi qabyldandy. Bul álemdik óndiristiń 3 paıyzyn quraıdy. Osy sheshimniń nátıjesinde álemdik naryqtaǵy ýran baǵasy 20 paıyzǵa qymbattap otyr.
Esterińizge sala ketsek, Qazaqstan barlanǵan ýran qory boıynsha álemde ekinshi orynda tur. Barlanǵan álemdik qordyń shamamen 12 paıyzy elimizdiń jer qoınaýynda shoǵyrlanǵan.
