Qazaqstan vaktsınatsııa kórsetkishi boıynsha álemde 105-orynda tur

NUR-SULTAN. QazAqparat – Qazaqstan halyqty KVI-ge qarsy vaktsınanyń 2 dozasymen qamtý kórsetkishi boıynsha 105-orynda . Bul týraly Úkimet otyrysynda QR Densaýlyq saqtaý mınıstri Alekseı Tsoı aıtty, dep habarlaıdy QazAqparat tilshisi.

«Álemdik reıtıngke sáıkes, koronavırýs ınfektsııasyna qarsy vaktsınatsııa júrgizgen 205 eldiń ishinde Qazaqstan halyqty KVI-ge qarsy vaktsınanyń 2 dozasymen qamtý kórsetkishi boıynsha 105-orynda tur jáne vaktsınatsııamen qamtý halyq sanynyń 41 paıyzǵa jýyǵyna jetti. TMD elderi ishinde Qazaqstan men Ázerbaıjan ǵana halyqty vaktsınatsııamen qamtýda 40 paıyzdan joǵary kórsetkishke qol jetkizip otyr», - dedi mınıstr.

Onyń atap ótýinshe, elimizde halyqty koronavırýs ınfektsııasyna qarsy vaktsınatsııalaý jalǵasyp jatyr.

«1-komponent 8,5 mln adam ekpe aldy. Ekpe alýǵa tıisti halyqty qamtý 74 paıyzdy nemese halyq sanynyń 44,8 paıyzyn quraıdy. 2-komponentpen shamamen 7,7 mln adam qamtyldy», - dedi Alekseı Tsoı.