Qazaqstan úsh ǵarysh apparatyn eksporttaýdan 75 mln dollar tabys alady
ASTANA. KAZINFORM – Qazaqstan úsh ǵarysh apparatyn Nıgerııa, Kongo jáne Mońǵolııaǵa eksporttaýdan 70-75 mıllıon dollar tabys alady. Bul týraly QR Tsıfrlyq damý, ınnovatsııalar jáne aeroǵarysh ónerkásibi vıtse-mınıstri Málik Oljabekov málim etti.
Onyń aıtýynsha, qazir alty ǵarysh apparatyn qurastyrý iske asyrylyp jatyr. Sonyń ishinde tórteýi jerdi qashyqtan zondtaýǵa arnalǵan optıkalyq spýtnık, taǵy ekeýi jer betin skanerleý jáne 3D keńistik derekterin beretin radarlyq spýtnık.
Ázirlenip jatqan apparattardyń úsheýi Kongo, Nıgerııa jáne Mońǵolııaǵa eksporttaýǵa arnalǵan.
- Bul jerde osy eksporttyq kelisimsharttar boıynsha jalpy málimetti aıta alamyn. Óıtkeni, kelisimshart talaptary boıynsha ár spýtnıktiń qunyn jarııalaýǵa bolmaıdy jáne ondaǵy naqty mán-jaıdy bilmeımin. Meniń baǵalaýym boıynsha, bul úsh spýtnıktiń jalpy quny 70-75 mıllıon dollar shamasynda, - dedi Málik Oljabekov Senatta tilshiler suraǵyna jaýap bere otyryp.
Onyń sózine qaraǵanda, Qazaqstanǵa arnalǵan spýtnıkterdi ázirleý jumystary 2026 jyldyń sońyna deıin aıaqtalady.
- Olardy qurastyrý qarqyndy júrip jatyr. Eger qatelespesem, 2027 jyldyń basynda ǵaryshqa ushyrylady. Taǵy úsh apparat 2028-2029 jyldar aralyǵynda daıyn bolady, - dedi vıtse-mınıstr.
Eske salaıyq, byltyr kúzde Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev spýtnıkterdi eksporttaýǵa qatysty eki elmen kelissóz júrgizip jatqanyn aıtqan edi.