Qazaqstan Túrikmenstannan avıatsııalyq kerosın ımporttaýy múmkin

Qazaqstan Túrikmenstannan avıatsııalyq kerosın ımporttaýy múmkin. Bul týraly Energetıka vıtse-mınıstri Erlan Aqkenjenov aıtty, dep habarlaıdy QazAqparat tilshisi.

«Ózderińiz biletindeı, Túrikmenstan da biz sııaqty munaıly el jáne munaı óńdeý qýattary bar. Olar óz ónimderin Kaspıı teńizi arqyly eksportqa shyǵarady. Osy jyldyń basynda Túrikmenstanda shyǵarylǵan avıatsııalyq otyndy testileýden ótkizý nusqasyn qarastyrdyq. Ol úshin avıatsııalyq kerosınniń tıisti kólemi jetkizilip, tikeleı zerthanaǵa jiberildi. Atalǵan zerthananyń qorytyndysyn kútip otyrmyz. Al benzın men dızel otynyna qatysty aıtar bolsam, biz bul máseleni qarastyrǵan joqpyz», - dedi Erlan Aqkenjenov XV KazEnergy Eýrazııalyq forýmy aıasynda BAQ ókilderiniń saýalyna oraı.

Osy oraıda vıtse-mınıstr ónimiń ózindik qunyna tasymaldaý shyǵyndary da kiretindigine nazar aýdartty.

«ıAǵnı, eger biz tasymaldaý turǵysynan qaraıtyn bolsaq, onda Túrikmenstannan ákelý ózge elderge, Reseıge qaraǵanda birshama qymbatqa túsedi. Jalpy, biz barlyq múmkindikti qarastyramyz. Ázerbaıjan, ózbek áriptesterimizben sóılestik. Kúni keshe ǵana ózbekstandyq áriptesim – vıtse-mınıstrmen sóılestim. Olar dızel otynyn jetkizýge daıyn ekendigin bildirdi. Ózderińiz de Ózbekstanda benzın jetpeıtindigin bilesizder. Kerisinshe, áriptesterimiz bizden benzın bólisýdi surap otyr. Qandaı da bir kólem jaıynda sóz joq. Tek aldyn ala sóılesý ǵana boldy. Másele jan-jaqty, tyńǵylyqty zerdelenbedi», - dedi ol.

Aıta keteıik, elordada XV KazEnergy Eýrazııalyq forýmy ótip jatyr. Halyqaralyq is-shara qatysýshylaryna Memleket basshysy Qasym-Jomart Toqaev quttyqtaý joldady.