Qazaqstan týynyń bıikte jelbiregenin armandaımyn — gımnast Aqmaral Erekesheva

ASTANA. KAZINFORM — Qazaqstandyq jas gımnast Aqmaral Erekesheva kórkem gımnastıkadan jasóspirimder arasyndaǵy álem chempıonatynda elimizge eki altyn medal syılap, tarıhta alǵash ret chempıon atandy. Ol jeńisten keıingi áserimen, armandarymen jáne aldaǵy sporttyq maqsattarymen Kazinform agenttiginiń tilshisimen bólisti.

— Aqmaral, siz Qazaqstan tarıhynda tuńǵysh ret jasóspirimder arasyndaǵy álem chempıony atandyńyz. Sol sáttegi sezimińiz esińizde me?

— Ony sózben jetkizý qıyn, keremet sezimder boldy. Alǵashynda bári tús sııaqty kórindi. Chempıon ekenimdi estigende oıyma eń birinshi kelgeni: «Biz muny jasadyq!» degen oı boldy. Qýanysh, maqtanysh, tolqý — bári bir sátte keldi. Eń bastysy — men tek medal utyp qana qoımaı, elim úshin mańyzdy qadam jasaǵanymdy sezindim. Bul sát meniń júregimde máńgi qalady.

— Gımnastıkaǵa qalaı keldińiz?

— Meni tórt jasymda anam Astanadaǵy gımnastıka zalyna alyp keldi. Sol kezden beri menimen birge kele jatqan alǵashqy jáne qazirgi jattyqtyrýshym — Balǵynbaeva Merýert Tólegenqyzy. Ol maǵan alǵashqy kúnnen senim artty, sol senim eshqashan sóngen joq. Onyń arqasynda men gımnastıkany jan-tánimmen jaqsy kórip, bar kúshimdi salyp eńbek etýdi úırendim. Ol — meniń ustazym, tálimgerim, barlyq jetistigim úshin oǵan sheksiz rızamyn.

— Sofııadaǵy álem chempıonatyna daıyndyq qalaı ótti?

— Bul óte qıyn kezeń boldy. Kún saıyn tynymsyz daıyndyq jasap, ár qımyldy qaıtalap jattyqtyq. Elementter, burylystar, ár qımyldyń sulýlyǵyna mán berdik. Keıde qatty sharshap, keı nárse shyqpaı qalyp júrdi. Biraq ne úshin tyrysyp júrgenimdi jaqsy bildim. Eń mańyzdysy — qoldaý. Jattyqtyrýshym árdaıym janymda bolyp, senimimdi kúsheıtip, durys kóńil-kúı syılaı aldy. Sol sebepti jarysqa senimdilikpen shyqtym.

— Aıtylmaı kelgen armanyńyz bar ma?

— Endi aıtýǵa bolady dep oılaımyn. Men árbir óner kórsetýimde Qazaqstan týy bıikte jelbireı berse eken dep armandaımyn. Elimdi ádemi, taza, laıyqty ónerimmen qýantqym keledi. Árıne, bul meniń sońǵy altyndarym bolmasa eken dep te armandaımyn.

— Sizdi gımnastıkada kimder shabyttandyrady? Súıikti sportshyńyz bar ma?

— Maǵan kóptegen gımnast qyzdar shabyt syılaıdy, árqaısysynyń óz ereksheligi bar. Biraq Germanııadan Darıa Varfolomeev maǵan erekshe jaqyn. Onyń tehnıkasy, qımyldarynyń tazalyǵy jáne kilemde óz-ózine senimdiligine tántimin. Onyń ónerinen kúsh, tynyshtyq pen sulýlyq seziledi. Men de sol sııaqty turaqty, myqty, taza óner kórsetýge umtylamyn.

— Zalda eń qıyn kúndi eske túsirińizshi. Qalaı eńserdińiz?

— Mundaı sátter ár gımnastyń basynan ótedi. Keıde bári qolyńnan kelmeı, kúshiń sarqylǵandaı bolady. Ondaıda qasyńdaǵy adamdardyń qoldaýy asa mańyzdy. Jattyqtyrýshym árdaıym durys sóz taba bildi. Ol meni jigerlendirip, senimin kórsetti. Sol arqyly ózimdi jınap, ary qaraı eńbek etýge kúsh saldym. Osyndaı qıyn sátterde komandanyń, senimniń mańyzy erekshe ekenin túsinesiń.

— Sporttan tys nemen áýestenesiz? Qaıdan kúsh-qýat jınaısyz?

— Sýret salǵandy qatty unatamyn. Qalam nemese qaryndashty qolǵa alǵan sátte tynyshtalyp, oıym bólinip, ózimdi tabamyn. Keıde kilemde sezingenimdi qaǵazǵa túsiremin nemese ónerime arnalǵan obrazdar oılap tabamyn.

— Oqý men sportty qatar alyp júrý qıyn emes pe?

— Iá, ekeýin birge alyp júrý ońaı emes. Jattyǵýdan keıin demalǵyń keledi, biraq barlyǵyn aldyn ala josparlap, keıinge qaldyrmaı jasaýǵa tyrysamyn. Muǵalimderim de túsinistikpen qarap, meniń mańyzdy jattyǵýlarym men jarystarymdy eskerip otyrady. Eń bastysy — ózińe senip, kún saıyn kishkene bolsyn alǵa qadam jasaýǵa umtylý.

— Gımnastıkadaǵy eń súıikti elementińiz qaısy?

— Eń jaqsy kóretinim — burylystar. Olar jeńil jáne dál oryndalǵan kezde erekshe rahatqa bóleıdi. Burylysta erkindik pen kúshti sezinemin. Jańa túrlerin baıqap, kúrdelendirip, sodan sulýlyq tabýǵa tyrysamyn.

Aıta keteıik, Aqmaral Erekesheva jasóspirimder arasyndaǵy álem chempıonatynda eki altyn jáne bir kúmis medal jeńip aldy. Ol aldymen doppen jattyǵýda top jaryp, keıin lentamen fınalda da úzdik atandy.