Qazaqstan TMU elderine 7,6 mlrd dollarǵa ónim eksporttaǵan

ASTANA. KAZINFORM — Qazaqstan Túrki memleketteri uıymyna múshe elderge negizinen mys, munaı, astyq jáne aýyl sharýashylyǵy ónimderin eksporttaıdy. Túrki elderimen taýar aınalymy derekterin Ulttyq ekonomıka vıtse-mınıstri Asan Darbaev aıtyp berdi. 

Vıtse-mınıstrdiń aıtýynsha, Qazaqstannyń TMU elderimen jalpy ózara saýda kólemi 10,4 mlrd dollarǵa jetken. Ásirese eń joǵary taýar aınalymy Túrkııa (4,36 mlrd dollar), Ózbekstan (3,88 mlrd dollar), Qyrǵyzstan (1,78 mlrd dollar) jáne Ázerbaıjan elderi (0,39 mlrd dollar) arasynda jasalǵan. Bul elderge uıym aıasyndaǵy ózara saýdanyń barlyq derlik kólemi tıesili.

Bul rette Qazaqstannyń TMU elderine eksporty 7,6 mlrd dollarǵa jetip, 17,1%-ǵa artqan. Import boıynsha, 2,8 mlrd dollar bolatyn ónim elge jetkizilgen. Nátıjesinde oń saýda saldosy 4,8 mlrd dollar boldy.

— Bul dınamıka túrki memleketteriniń naryqtarynda qazaqstandyq ónimge suranystyń artyp kele jatqanyn kórsetedi. Eksporttyń ósýi eń aldymen mys pen mys katodtaryn, shıki munaı, bıdaı, munaı ónimderin, kúnbaǵys maıyn, sondaı-aq metallýrgııa men aýyl sharýashylyǵy ónimderin jetkizýdiń artýymen baılanysty. Bul shıkizattyq baǵyttyń saqtalǵanyn ǵana emes, qosylǵan quny joǵary taýarlardyń da kóbeıip kele jatqanyn bildiredi, — dedi Asan Darbaev Túrki saýda-ónerkásip palatalary odaǵynyń úshinshi otyrysynda.

Asan Darbaev Qazaqstannyń TMU aıasyndaǵy ózara is-qımylǵa erekshe mán beretinin jetkizdi.

— Búginde túrki óńiri aıtarlyqtaı ekonomıkalyq áleýetke ıe jáne bizdiń ortaq mindetimiz — osy áleýetti tolyq ashý. Osy turǵyda Túrki saýda-ónerkásip palatalary odaǵynyń róli sheshýshi mánge ıe. Dál osy bıznes-qoǵamdastyqtar arasyndaǵy tikeleı baılanys arqyly turaqty seriktestikter qalyptasyp, birlesken jobalar iske qosylady jáne ekonomıkalarymyz úshin jańa múmkindikter paıda bolady, — dedi Ulttyq ekonomıka vıtse-mınıstri.

Aıta keteıik, 2026 jyly Qazaqstan túrki elderiniń saýda-ónerkásip palatalary odaǵyna tóraǵalyq etedi.