Qazaqstan TMU elderi arasyndaǵy týrızmdi damytady
ASTANA. KAZINFORM – Qazaqstan TMU elderi arasyndaǵy týrızmdi damytý aıasyndaǵy jumysty jandandyrýǵa nıetti. Ótken aptanyń sońynda Qazaqstannan kelgen delegatsııa Túrki memleketteri uıymy elderindegi týrızm boıynsha, onyń ishinde Túrkistandy ilgeriletý úshin birden eki is-sharaǵa qatysty. Bul týraly Kazakh Tourism Ulttyq kompanııasynyń baspasóz qyzmeti jazdy.
Túrkııada jyl saıynǵy East Mediterranean International Tourism & Travel Exhibition (EMITT) kórmesi ótti, oǵan 28,5 myń adam qatysty. Kórmege qatysý aıasynda Kazakh Tourism Ulttyq kompanııasynyń tóraǵasy Qaırat Sádýaqasov pen Túrkistan halyqaralyq áýejaıynyń bas dırektory Hamdı Gıývench bastaǵan qazaqstandyq delegatsııa Túrki memleketteri uıymy Bas hatshysynyń orynbasary Mırvohıd Asımovpen kezdesti.
Kezdesýde taraptar, rýhanı astana jáne 2024 jylǵy túrki áleminiń týrıstik astanasy Túrkistanda ótetin perspektıvalyq josparlar men jobalardy talqylady.
Sonymen qatar, kórmede Kazakh Tourism ulttyq kompanııasynyń ókilderi birqatar baǵyttar boıynsha áriptestik ornatýǵa til tabysty. Mysaly, Paximum platformasynyń túrik marketpleıs tájirıbesin paıdalana otyryp, týrıstik salany tsıfrlandyrý kózdeldi. Túrik týroperatorlarymen jáne Qoja Ahmet ıAsaýı murasyn zertteıtin sarapshylarmen kezdesýler ótip, qajylyq týrızmin damytý máseleleri talqylandy. Sondaı-aq, Pronto Tour jáne Pronto MICE-pen seriktestikte Túrkııadan Qazaqstanǵa týrıstik aǵymdy ulǵaıtý josparlanýda.
Odan keıin Ózbekstandaǵy Samarkand Tourism Forum-ynda Kazakh Tourism basshysy Ózbekstannyń eń iri týroperatorlarynyń biri Rocket Group-pen yntymaqtastyq týraly Memorandýmǵa qol qoıdy.
Qol qoıýdyń negizgi nátıjesi Túrkııadan, Ońtústik Koreıadan jáne basqa da birqatar elderden Túrkistanǵa Rocket Group kompanııasynyń týrıstik toptaryn tartý bolyp tabylady.
«Ózbekstandyq áriptester týrıstik qyzmetter naryǵynda uzaq ýaqyt jumys istep keledi jáne óńirge týrısterdiń úlken kólemin tartady. Rocket Group-pen seriktestikte biz Ózbekstanǵa keletin saıahatshylar úshin geografııany keńeıtip, Túrkistanǵa ákelýdi qalaımyz. Bıyl Túrkistan «Túrki áleminiń» týrıstik astanasy mártebesindegi is-sharalardyń naǵyz oazısi bolýǵa nıetti. Biz bul brendti tanymal etýde naqty qadam jasadyq», - dep atap ótti Qaırat Sádýaqasov.
Qazaqstan Prezıdenti Qasym-Jomart Toqaev 2023 jylǵy 3 qarashada Túrki Memleketteri Uıymynyń X sammıti aıasynda «Túrki álemi» jańa brendin tanymal etý týraly aıtqan bolatyn.
