Qazaqstan tennıs quramasy Argentınada Devıs kýbogine daıyndalyp jatyr

ASTANA. KAZINFORM – 3-4 aqpanda Rosarıo qalasyndaǵy «Jokeı Klýb de Rosarıo» topyraq tósenishindegi kortta Qazaqstan quramasy Argentınamen komandalyq álem chempıonaty – Devıs kýboginiń irikteý matchyn ótkizedi.

Qazaqstan tennıs federatsııasynyń baspasóz qyzmetinen málim etkendeı, qazaqstandyqtar jattyǵýǵa kiristi.

Argentınanyń halyq sany jóninen úshinshi qalasyna kapıtan ıÝrıı Şýkın bastaǵan Denıs Evseev, Tımofeı Skatov, Dmıtrıı Popko jáne Aleksandr Nedovesov bardy.

Argentına – 2016 jylǵy Devıs kýboginiń jeńimpazy. Sondaı-aq 1981, 2006, 2008 jáne 2011 jyldary fınalǵa shyqqan tájirıbeli komanda. Bul qos quramanyń ózara úshinshi kezdesýi bolmaq. Ázirge esep teń – 1:1.

«Korttyń sapasy óte jaqsy. Ásirese, ótken jyly biz oınaǵan Bolgarııa nemese Chılıdegi jaǵdaımen salystyrǵanda, deńgeıi joǵary. Argentınalyqtar jaqsy daıyndalǵan. Olar topyraq tósenishin qolaıly kóredi. Argentınanyń kúshti qurammen oınaıtynyn bári jaqsy biledi. Degenmen biz barynsha qarsy turyp, olardyń josparyn buzýǵa tyrysamyz», - dedi Tımofeı Skatov.

Bastapqy kúni eki jekeleı syndaǵy báseke ótedi. Ekinshi kúni bir juptyq, eki jekeleı kezdesý bolmaq. Jup jeńimpazy qyrkúıekte ótetin Devıs kýboginiń fınaldyq kezeńine joldama alady.

Eske sala keteıik, budan buryn qazaqstandyq tennısshiniń Monpele týrnıriniń ekinshi aınalymyna shyqqanyn jazǵan bolatynbyz.  Sondaı-aq ıÝlııa Pýtıntseva Taılandtaǵy týrnırdiń shırek fınalyna ótti.