Qazaqstan temir joldarynda qozǵalys qaýipsizdiginiń buzylýy 10% azaıdy
Eýrazııalyq forým tájirıbe almasýǵa arnalǵan iri ári tıimdi alańǵa aınaldy.
Forýmda «Reseı temir joldary» AAQ bas dırektory - basqarma tóraǵasy Oleg Belozerovtyń quttyqtaýy oqyldy. Oleg Belozerov quttyqtaý jedelhatynda tasymaldaýdyń senimdiligin qamtamasyz etýdiń jańa, standartty emes tásilderin tabý zaman talaby ekenin atap ótti. Qashyqtyqtan dıagnostıkalaý men túpkilikti baqylaý, kompıýterlik modeldeý jáne pılotsyz basqarý ádisteri úlken áleýetke ıe.
Óziniń quttyqtaý sózinde «RTJ» AAQ bas dırektorynyń orynbasary – Qozǵalys qaýipsizdigi departamentiniń bastyǵy Shevket Shaıdýllın jáne «Temirjol tehnıkasyn óndirýshiler birlestigi» qaýymdastyǵynyń prezıdenti Valentın Gapanovıch temirjoldaǵy qozǵalys qaýipsizdigin qamtamasyz etý boıynsha qazaqstandyq áriptestermen úılesimdi jumysty atap ótti. Sarapshylar ár protsestiń ıesi táýekelderdi anyqtap, olardy baǵalaýy qajet ekenin, keıin olardy azaıtý úshin sharalar qabyldaýy qajet ekenin aıtty. Poıyzdar qozǵalysyn qaýipsizdigin qamtamasyz etýde biryńǵaı tásil bolýy tıis.
«Qazaqstan temir joly» UK« AQ basqarma tóraǵasynyń orynbasary Qanat Álmaǵambetov ınfraqurylymdy damytý, jyljymaly quram sanyn ulǵaıtý jáne júk aǵynyn arttyrý, sonymen birge, tasymaldaý protsesiniń qaýipsizdigin qamtamasyz etý ulttyq kompanııanyń basym mindeti ekenin atap ótti. Aǵymdaǵy jyldyń 9 aıynda ótken jyldyń sáıkes kezeńimen salystyrǵanda temirjoldaǵy qozǵalys qaýipsizdigin buzý deregi 10% - ǵa tómendedi. Árbir úshinshi buzýshylyq adamdy basyp ketý, qaraýsyz júrgen maldy qaǵý, temirjol ótkelderindegi jol-kólik oqıǵalarymen baılanysty.
Bul máselelerdi sheshý úshin Іshki ister mınıstrligi jáne Indýstrııa jáne ınfraqurylymdyq damý mınıstrligimen birlesip jol kartasy ázirlenip, iske asýda. Ol qaýipti faktordy iske asyrýdyń yqtımaldyǵy men onyń saldary qanshalyqty aýyr bolatynyn eskere otyryp, tasymaldaý protsesine qatysýshylar jáne úshinshi tulǵalardyń ómiri men densaýlyǵyna, qorshaǵan ortaǵa zııan keltirý boıynsha táýekelderdi boldyrmaýǵa baǵyttalǵan.
Jol kartasy aıasynda 214 lokomotıvte beınebaqylaý júıesi ornatyldy. Adamdar men qaraýsyz maldyń temir jolǵa shyǵyp ketýine qarsy qorshaý ornatý jáne olardy jóndeý jumystary júrgizilýde. Sondaı-aq, temir joldardyń belgilenbegen jerinen ótkeni úshin, temir joldan ótý erejelerin buzǵany jáne temir joldardyń bólingen beldeýinde maldyń jaıylǵany úshin aıyppul sanktsııasyn ulǵaıtý qarastyrylýda.
»Qazaqstan temir joly« UK» AQ-nyń qozǵalys qaýipsizdigi departamentiniń dırektory Marat Shákenov atap ótkendeı, adamı faktordyń qozǵalys qaýipsizdigine áserin azaıtý úshin 2022-2023 jyldar «Qozǵalys qaýipsizdigi mádenıetin damytý jyldary» dep jarııalandy. Munda poıyzdar qozǵalysynyń qaýipsizdigin qamtamasyz etýge baılanysty qyzmetkerlerdiń biliktiligin arttyrý men psıhologııalyq daıarlyǵyna basty nazar aýdarylady. Qazirgi tańda buqaralyq kásiptiń 9 myńnan astam qyzmetkeri oqýdan ótti. Personaldy yntalandyrý júıesi engizildi, eńbek jaǵdaıy jaqsarýda. Qozǵalys qaýipsizdiginiń buzylýynyń aldyn alǵany úshin 500-den astam adamǵa syıaqy berildi.
Spıkerdiń aıtýynsha, temirjoldyń qyzmetteri men jelilik kásiporyndarynyń eskertýlerin joıý boıynsha qabyldanyp jatqan sharalardy baqylaý jáne aqparat jınaý protsesin avtomattandyrý jumysy jalǵasýda. Mysaly, «Mashınıstiń eskertýler kitaby», «Stantsııany komıssııalyq aılyq tekserý», «Tejegish quralyn esepke alý jáne saqtaý», «Tehnıkalyq quraldardyń isten shyǵýyn esepke alý jáne tekserý» avtomattandyrylýda.
«Búgingi kúni «Tsıfrly Qazaqstan» memlekettik baǵdarlamasy men «Tsıfrlyq transformatsııa» baǵdarlamasy aıasynda «QTJ» UK» AQ-nyń magıstraldyq jelisinde joldy dıagnostıkalaý kezinde arnaıy bir vagonnyń bazasynda mobıldi dıagnostıkalyq quraldar (MDQ) qoldanylady. Onda ártúrli maqsattaǵy dıagnostıkalyq júıeler biriktirilgen. Bul barlyq parametrlerdi bir koordınattar júıesine baılanystyra otyryp, joldy keshendi dıagnostıkalaýǵa múmkindik beredi«, - dedi ol.
Forým aıasynda «Vagondar men vagon sharýashylyǵy«, «Kólik-logıstıka men kommýnıkatsııa salasy úshin kadrlar daıarlaý tujyrymdamasy« atty taqyryptyq pikirtalas sessııalary ótti. «Temirjol kóliginde qaýipsizdikti qamtamasyz etý«, «Kólik júıesin jańǵyrtý men temirjol salasyn tsıfrlyq transformatsııalaý« paneldik otyrystary kóptiń qyzyǵýshylyǵyn týdyrdy.
Atalǵan is-shara aıasynda kólik-logıstıka salasy men Logıstıka jáne kólik akademııasynyń zııatkerlik menshigi ázirlegen ónimderdiń kórmesi uıymdastyryldy.
Forýmdy ótkizýdiń negizgi mindetteri qaýipsizdik pen tsıfrlandyrýdy qamtamasyz etý jáne tasymaldaý protsesine qatysýshylar men úshinshi tulǵalardyń ómirine, densaýlyǵyna, qorshaǵan ortaǵa, múlkine zııan keltirý jaǵdaılaryn boldyrmaý úshin tasymaldaý protsesiniń operatsııalaryn oryndaý kezinde eskertý sharalaryn ázirleý boldy.
