Qazaqstan Syrtqy ister mınıstriniń Shveıtsarııaǵa resmı sapary bastaldy
Qazaqstan men Shveıtsarııa ekijaqty qarym-qatynastardyń barlyq spektri boıynsha ózara tıimdi, kópjosparly yntymaqtastyqty damytýǵa nıetti. Qazaqstan SІM basshysy M.Tileýberdi Shveıtsarııa Vıtse-prezıdenti, Federaldyq keńesshisi (mınıstri) Ignatsıo Kassıspen kelissózderiniń negizgi leıtmotıvy osyndaı.
«Shveıtsarııa Qazaqstannyń Eýropadaǵy mańyzdy saıası jáne ekonomıkalyq áriptesteriniń biri. Biz senimge, ózara qurmetke jáne ortaq basymdyqtarǵa negizdelgen berik qatynastar ornattyq. Bul qatynastar jahandyq jáne óńirlik qaýipsizdikti qamtamasyz etýdegi senimdi seriktestikpen, serpindi saýda yntymaqtastyqpen, sondaı-aq saıası jáne tulǵaaralyq qatynastarmen nyǵaıtylýda», - dedi M.Tileýberdi.
Qazaqstan men Shveıtsarııanyń joǵary basshylyǵy arasyndaǵy baılanystardyń qarqyndy damyýyn jáne ekijaqty ózara is-qımyldy nyǵaıtýǵa ózara múddeliliktiń artyp kele jatqanyn atap ótip, taraptar úkimetaralyq, parlamentaralyq jáne iskerlik baılanystardy damytýǵa odan ári járdemdesýge kelisti. Bul turǵyda Qazaqstan Respýblıkasynyń Prezıdenti Qasym-Jomart Toqaevtyń ú.j. qarashada Shveıtsarııaǵa resmı saparyna daıyndyq barysyna erekshe nazar aýdaryldy.
Halyqaralyq máseleler boıynsha pikir almasý barysynda taraptar BUU, EQYU jáne basqa da kópjaqty qurylymdar aıasyndaǵy ózara is-qımyldy talqylady. Kelissózderdiń kún tártibine óńirlik máseleler, sonyń ishinde Aýǵanstandaǵy jaǵdaı, Ortalyq Azııa elderimen yntymaqtastyq jáne sý resýrstaryn basqarý kirdi. Damýǵa resmı kómek jelisi boıynsha, atap aıtqanda qazaqstandyq KazAID Halyqaralyq damý agenttigi jáne Shveıtsarııanyń SDC Damý jáne yntymaqtastyq agenttigi arasyndaǵy birlesken jumys aspektileri qozǵaldy.
Kelissózder qorytyndysy boıynsha delegatsııa basshylary dıplomatııalyq nemese qyzmettik pasporttardyń ıelerin vızalyq talaptardan ózara bosatý týraly, sondaı-aq dıplomatııalyq ókildikter, halyqaralyq uıymdar janyndaǵy turaqty ókildikter men konsýldyq mekemeler qyzmetkerleriniń otbasy músheleriniń aqyly eńbek qyzmeti týraly eki úkimetaralyq kelisimge qol qoıdy.
Syrtqy saıası kún tártibindegi ekonomıkalyq dıplomatııanyń basymdyǵyn eskere otyryp, Mınıstr M.Tileýberdi sol kúni Shveıtsarııanyń «Stadler Rail», «Ammann Group», «Sandoz», «KS Genetics», «Inoks Capital» jáne «Philip Morris International» iri kompanııalarynyń basshylarymen kezdesýler ótkizdi.
Qazaqstandaǵy ınvestıtsııalyq ahýaldy jaqsartý boıynsha qabyldanyp jatqan sharalardy usyna otyryp, Mınıstr shveıtsarııalyq áriptesterdi ınvestıtsııalardy tartýdy yntalandyrýdyń jańa quraly «Strategııalyq ınvestıtsııalyq kelisimmen» tanystyrdy.
Saýda-ekonomıkalyq yntymaqtastyqty damytýdyń úlken áleýeti Shveıtsarııa bıznesiniń hımııa-farmatsevtıka jáne mashına jasaý, jańa tehnologııalar men energetıka salasynda, agroónerkásip kesheni (AÓK) men qarjy sektorynda ózara tıimdi jobalardy iske asyrýǵa múddeliligimen rastalady. Shveıtsarııanyń Qazaqstannyń iri syrtqy ekonomıkalyq seriktesteriniń biri retindegi róli men mańyzy atap ótildi. 2020 jyly Shveıtsarııa Qazaqstanǵa tartylǵan tikeleı sheteldik ınvestıtsııalar kólemi boıynsha 3-shi oryndy, al bizdiń elmen ekijaqty saýda kólemi boıynsha 10-shy oryndy ıelendi.
Sapar aıasynda «Kazakh Invest» UK» AQ men shveıtsarııalyq kompanııalar arasynda Qazaqstannyń AÓK jáne mashına jasaý salasyndaǵy ınvestıtsııalyq jobalardy iske asyrý boıynsha yntymaqtastyq týraly memorandýmdarǵa qol qoıyldy.
Syrtqy ister mınıstri bastaǵan qazaqstandyq delegatsııa Bern tarıhı murajaıynda Qazaq memlekettiliginiń tarıhynan biregeı muraǵattyq materıaldarǵa arnalǵan arnaıy kórmeni aralady. Mýzeıde sondaı-aq R.B. Súleımenov atyndaǵy Shyǵystaný ınstıtýty, Bern tarıhı mýzeıinde jáne Bern ýnıversıteti arasynda «Ortalyq Azııa men Shveıtsarııanyń túrki halyqtarynyń murasy» atty kelisimge qol qoıý rásimi ótti.
