Qazaqstan sý mamandarynyń alǵashqy toby Qytaıda oqýyn bastady
ASTANA. KAZINFORM — Sý resýrstary jáne ırrıgatsııa mınıstrliginiń bastamasymen Qazaqstan sý mamandarynyń alǵashqy toby Qytaıda biliktilik arttyrý kýrsyn bastady.
Osyǵan deıin Sý resýrstary jáne ırrıgatsııa mınıstrligi qytaılyq áriptesterimen tıisti kelisimge qol jetkizgen bolatyn. Alǵashqy topta 30 maman. Odan ári 25 adamnan jasaqtalatyn taǵy 3 top Qytaıda oqıdy.
Mınıstrlik málimetinshe, kórshi eldegi eki aptalyq biliktilikti arttyrý kýrstarynan jalpy sany 105 sý mamany ótedi. Aıta ketý kerek, oqý kýrsyn Qytaı taraby óz esebinen uıymdastyrdy jáne is-sharaǵa memlekettik bıýdjetten qarajat bólingen joq.
- Mınıstrliktiń bastamasymen júzden astam qazaqstandyq maman ózderiniń bilimi men kásibı daǵdylaryn shyńdaý múmkindigine ıe boldy. Qytaı sý sharýashylyǵy salasynda ozyq tehnologııalarǵa ıe, sondyqtan osy eldiń tájirıbesin zerdeleý elimizdiń sý salasyn damytýǵa kómektesedi. Sonymen qatar bizdiń mınıstrlik basqa memlekettermen de osyndaı kýrstardy uıymdastyrý boıynsha belsendi kelissóz júrgizip jatyr. Osyǵan deıin birneshe sý mamany Frantsııa men Japonııada bilim alyp keldi, - dedi Sý resýrstary jáne ırrıgatsııa vıtse-mınıstri Nurlan Aldamjarov.
Eske salsaq, bıyl naýryz aıynda alǵash ret Qazaqstan men Qytaıdyń sý vedomstvolary sý resýrstary salasynda ózara túsinistik pen yntymaqtastyq týraly Memorandýmǵa qol qoıdy.
Qujat sý resýrstaryn utymdy jáne ornyqty paıdalaný, zamanaýı tehnologııalardy engizý, balamaly sý kózderin bólý jáne ıgerý, sondaı-aq tájirıbe almasý jáne birlesip maman daıarlaý salasynda ekijaqty yntymaqtastyqty nyǵaıtýdy kózdeıdi.
Elimizdiń sý mamandary Qytaı jáne Frantsııada biliktiligin arttyratynyn jazǵan bolatynbyz.