Qazaqstan sheteldik ǵylym doktory dıplomdaryn taný protsesin toqtata ma – vıtse-premer jaýaby
ASTANA. KAZINFORM – Premer-Mınıstrdiń orynbasary Tamara Dúısenova Májilis depýtattarynyń elimizde sheteldik ǵylym doktory dıplomdaryn taný protsesin toqtatýǵa qatysty saýalyna jaýap berdi.
«Qazaqstan 2010 jyldan bastap Bolon protsesiniń tolyq quqyly múshesi sanalady jáne Ulttyq biliktilik sheńberin bekitti. Ol Eýropalyq biliktilik sheńberi jáne Bilim berýdiń halyqaralyq standarttyq jiktelimi negizinde ázirlengen. «Bilim týraly» zańǵa sáıkes, Qazaqstanda ǵylym kandıdat jáne ǵylym doktory ǵylymı dárejeleri berilmeıdi. Qazaqstanda ǵylym doktoryn taný Eýrazııalyq ekonomıkalyq odaq týraly halyqaralyq sharttyń mindettemelerine sáıkes PhD doktory dárejesin berý jolymen júzege asyrylady», - dedi Úkimet basshysynyń orynbasary.
Onyń atap ótýinshe, 2023 jyly bekitilgen Bilim týraly qujattardy taný qaǵıdalarymen reglamenttelgen sheteldik qujattardy taný protsedýrasy ulttyq múdege saı keletin ólshemsharttardy qamtıdy. Máselen, sońǵy 3 jylda shetelidk dıplomdardy taný týraly 306 ótinish túsip, onyń ishinde 103 dıplom tanylmaǵan. Bul – 33,6 paıyz. Sonymen qatar EAEO-daǵy seriktes elderden tarapynan da ótinishter sanynyń tómendeýi baıqalady.
«Óz kezeginde, qaǵıda áreketin toqtatý Qazaqstannyń halyqaralyq shart normalaryn júzege asyrý jónindegi mindettemelerin buzýǵa, shetelde ǵylym doktory ǵylymı ataǵyn alǵan azamattardyń quqyǵyna nuqsan keltirýge alyp keledi», - dedi Tamara Dúısenova.
