«Qazaqstan» shahtasyndaǵy apattan esh sabaq alynbady – Depýtat

«Qazaqstan» shahtasyndaǵy qaıǵyly oqıǵadan keıin qaýipsizdik tehnıkasy kúsheıtilmedi, eskertý júıelerine aýdıt júrgizilmedi. Bul týraly Parlament Májilisiniń depýtaty Nıkıta Shatalov aıtty, dep habarlaıdy Kazinform.

«Qazaqstan» shahtasyndaǵy qaıǵyly oqıǵadan keıin 2 aıdan astam ýaqyt ótti. Menshik ıesi bolǵan oqıǵa týraly eshqandaı qorytyndy jasaǵan joq. Qaýipsizdik tehnıkasy kúsheıtilmedi, eskertý júıelerine aýdıt júrgizilmedi. Adamdar óle berdi. Mıttal men onyń qaramaǵyndaǵylarǵa bizdiń otandastarymyzdyń jaı-kúıi báribir», - deıdi depýtat.

N. Shatalov Úkimettiń Arselormen kelissózderge núkte qoıýy kerektigin, bizdiń elimizge mundaı ınvestor qajet emestigin basa aıtty.

«Tek sońǵy jyldary olar júzdegen mıllıard teńge paıda tapty. Jańǵyrtý men ónerkásiptik qaýipsizdikke bólingen ınvestıtsııalyq baǵdarlamalar aqshasy qaıda ketti degen jeke suraq týyndaıdy. Bul týraly da oılaný kerek, óıtkeni bireýlerdiń jasyryp-kómektesýi bolmasa, munyń bári múmkin emes edi. Bizge otandyq ınvestor kerek.
Mıttaldyń kásiporyndarynda jumys isteıtin jerlesterimniń onyń ketýinen qorqatynyn bilemin. 90-shy jyldardan beri eshteńe ózgergen joq. Biraq eger ol qalsa, bizde birde-bir jumys isteıtin shahta qalmaıdy. Óıtkeni tragedııalar ári qaraı da qaıtalanatyny anyq. Temirtaýdaǵy shahtalar men zaýytta jumys isteıtin adamdardyń ómirin saqtap qalýdyń jalǵyz joly – menshik ıesiniń aýysýy. Jáne bul múmkindiginshe tez bolýy kerek», - dep pikir bildirdi spıker.

Memleket basshysy Úkimetke «ArselorMıttalTemirtaý» kompanııasymen ınvestıtsııalyq yntymaqtastyqty toqtatýdy tapsyrdy.