Almaty aporty resmı túrde Qazaqstannyń ulttyq brendi atandy

ASTANA. KAZINFORM — Memleket basshysy BUU Azyq-túlik jáne aýyl sharýashylyǵy uıymynyń (FAO) bas dırektory Tsıýı Dýnıýımen kezdesti, dep habarlaıdy Aqordanyń baspasóz qyzmeti.

Qasym-Jomart Toqaev Astana halyqaralyq forýmyna qatysý úshin elimizge kelgen BUU Azyq-túlik jáne aýyl sharýashylyǵy uıymynyń (FAO) bas dırektory Tsıýı Dýnıýımen kezdesý ótkizdi.

Prezıdent jahandyq azyq-túlik qaýipsizdigi men aýyl sharýashylyǵynyń ornyqty damýyn qamtamasyz etýde Qazaqstannyń Uıymmen yntymaqtastyǵy mańyzdy ekenin atap ótti. Elimizdiń Aýyl sharýashylyǵy mınıstrligi FAO bıýrosymen tyǵyz seriktestik ornatyp, 27 jobany tabysty júzege asyrdy. Qazirgi ýaqytta qýańshylyq pen aýylsharýashylyq alqaptarynyń sortańdanýy jaǵdaıynda tabıǵı resýrstardy basqarý, ornyqty akvamádenı damý, topyraq qunaryn saqtaý sekildi salalarda taǵy 14 joba iske asyrylyp jatyr.

Tsıýı Dýnıýı Qazaqstannyń jahandyq azyq-túlik qaýipsizdigin qamtamasyz etý jáne gýmanıtarlyq kómek kórsetý isinde aıtarlyqtaı ról atqaratynyn aıtty.

Áńgimelesý barysynda ulttyq alma brendi sanalatyn Almaty aportyna erekshe nazar aýdaryldy. Qazaqstan resmı túrde aporttyń otany bolyp moıyndaldy. Qasym-Jomart Toqaev pen Tsıýı Dýnıýı ózara tıimdi nátıjelerge qol jetkizý úshin seriktestikti odan ári nyǵaıtýǵa daıyn ekenderin rastady.

Buǵan deıin Qasym-Jomart Toqaev Eýropa Keńesiniń Bas hatshysy Alen Berseni qabyldaǵanyn jazǵanbyz.